IN KORT

STILBAAI Die Suid-Afrikaanse Erfenis Hulpbronne Agentskap het die Noordkapperpunt visvywers by Stilbaai as ’n nasionale erfenisterrein verklaar. Die visvywers se oorsprong en tydperk wat dit reeds bestaan, is onbekend. Dit is reeds vanaf die 20ste eeu deur plaaslike vissermanne en landbouers onderhou en is tans steeds bruikbaar. Die plaaslike gemeenskap het die vywers onderhou en gebruik, maar dit is stadig en seker besig om verlore te raak. Navorsing in Suid-Afrika wys dat hierdie tegnologie gedurende koloniale tye gebruik is met bewyse in die argiewe dat dit terugdateer van 1892 en vorentoe. Visvywers is gebou sodat die see met hoogwater bo-oor die klippe spoel en dié mensgemaakte poele vul. Vis word dan daarin vasgekeer. Met laagwater trek die see weer terug terwyl die vis agterbly. Dit het vangs vergemaklik en was baie effektief.