Nuwe wiele vir munisipaliteit
HESSEQUA Die plaaslike munisipaliteit het ’n tenderproses gevolg om 10 voertuie te bekom en verligting te bied vir die uitgediende voertuie in die munisipale vloot. Aansoek is gedoen by Kaapstadmunisipaliteit om drie tweedehandse voertuie te bekom en die verdere tekort aan voertuie in die Hessequa-vloot aan te vul. Uitgediende voertuie word slegs vervang indien dit nie meer ekonomies haalbaar is om dit te laat herstel nie. Die tekort aan voertuie binne die beskermingsdiensteafdeling is in ’n aksieplan vervat en is die aankoop van ’n 4x4 bakkie as noodsaaklik beskou om dienslewering op alle terreine te bied. Twee van die sedanmotors vervang twee van die uitgediende voertuie in die beskermingsdienste-afdeling. Die munisipaliteit bedien ’n gebied van ongeveer 5 733 vierkante kilometer en ’n beraamde bevolking van 55 559. Die effektiewe dienslewering van basiese dienste soos toegang tot water, sanitasie, elektrisiteit, vullisverwydering en beskermingsdienste kan nie plaasvind indien daar nie genoegsame vervoer vir amptenare is nie. Volgens die munisipaliteit is die verkryging van die voertuie bloot die implementering van ’n beplande diens binne die omvang van die huidige begroting en bekostigbaarheid. Die munisipaliteit beskik oor ’n voertuig-bestuursprogram waardeur elke voertuig en die bestuurder elektronies gemonitor word. Elke bestuurder beskik oor ’n kontroleskyfie wat slegs vir daardie persoon en voertuig geaktiveer word. Streng kontrole word oor alle voertuie uitgeoefen. Tenders • 4x4 Bakkie vir beskermingsdienste – een voertuig. • Sedanmotors vir onderskeie departemente; beskermingsdienste, tegniese departement en gemeenskapsdienste – drie voertuie. • LDV bakkies vir die tegniese departement – ses voertuie.
Die tekort aan voertuie binne die beskermingsdiensteafdeling is in ’n aksieplan vervat en is die aankoop van ’n 4x4 bakkie as noodsaaklik beskou.