Potjies prut op Albertinia
ALBERTINIA Garden Route Game Lodge is as die wenners van die jaarlikse Albertinia hotel-potjiekoskompetisie aangewys wat vanjaar op Saterdag 17 Maart aangebied is. Die organiseerder, Lumè Vermeulen, is effens teleurgesteld met die aantal inskrywings, maar beoog om volgende jaar baie meer deelnemers te trek. William Ferreira van Knysna se sang en musiek het bygedra tot ’n feestelike atmosfeer terwyl gesellig om die potte gekuier is. Deelnemers en besoekers het ook op die parkeergebied gedans. Verlede jaar se wenners, Suid-Kaap Pale, gelei deur Alvin Roelofse, het derde geëindig en moes die wisseltrofee aan die span van Garden Route Game Lodge, bestaande uit Ronel Breytenbach, Malcolm Baxter en PJ Groenewald afstaan, wat heel springbokskenkels en wildesampioenpotjie gemaak het. Dit is aangevul met suurvyblatjang, stampmielies en mieliepoffertjies. Die Windpompkombuis, ’n span van Albertinia Hotel, was in die tweede plek met hulle heerlike lamskenkelpotjie met kleurvolle groentes. Volgens die beoordelaars, Des Smith, René en Christo Shacks was die gehalte uitstekend en die topvyf se punte het min van mekaar verskil. Plaaslike besighede het gesorg vir goeie pryse en Vermeulen bedank al hul borge vir hul bydraes en ondersteuning, waarvan heelwat ook spanne ingeskryf het. Volgende jaar se kompetisie vind weer in Maart plaas en spanne word genooi om vroeg in te skryf.