Jong leerder roem as held
‘’n Vreemde man het na my toe gekom en gesê dat die een meisie in die moeilikheid is en dit lyk of sy verdrink.’
RIVERSDAL ’n Graad 10-leerder van Gerrit du Plessis Senior Sekondêr, Codian Michaels, kan na dese as ’n held beskou word. Michaels (17) was op Saterdag 3 Maart saam met die skool se VLR op ’n kamp op Hartenbos. Van die aktiwiteite wat hulle gedoen het, het by die see plaasgevind. ‘‘Ek het in ’n stadium eenkant gaan sit omdat ek moeg was en gesien dat die seestrome sterk was, omdat die branders ook hoër as gewoonlik was,’’ vertel hy. Hy het drie meisies in die see opgemerk wat op hul branderplanke gery het. Twee van hulle het ’n bietjie later uitgekom. ‘‘’n Vreemde man het na my toe gekom en gesê dat die een meisie in die moeilikheid is en dit lyk of sy verdrink.’’ Hy het vermoed dat die man nie kon swem nie, daarom dat hy hóm genader het. Michaels het nie gehuiwer nie, maar dadelik in die see gegaan en omdat die stroom baie sterk was, saam daarmee beweeg. Toe hy by die meisie kom het hy aan haar gesê dat sy nie moet spartel nie en haar toe na veiligheid gebring. ‘‘Alles het so skielik gebeur dat ek nie eens haar naam gevra het nie.’’ Caville Abrahams, koördineerder by Hessequamunisipaliteit vir opleiding aan lewensredders het aan Suid-Kaap Forum gesê dat Michaels verlede jaar gedurende September tot November opleiding as lewensredder ontvang het. Hy het ook gedurende feesseisoen tussen Desember en Januarie in die Hessequa-streek diens gedoen. Sy ouers, Theonita en Jacob Michaels, is baie trots op hul seun.