Palings word bedreig deur onbekende dier
STILBAAI Drie van die mak varswaterpalings wat al vir dekades in die varswaterfontein by die Palinggat-opstal bly, is die afgelope week deur vermoedelik ’n otter doodgebyt.
Maandag- en Woensdagaand het twee palings in die slag gebly, terwyl ’n inwoner die vorige week óók ’n dooie paling verder af in die varswaterstroom by die toerismeburo gesien het. Hannetjie Ferguson wat in die toerismekantoor werksaam is, voer die palings al vir die afgelope byna 24 jaar daagliks om 11:00 en is dit ’n belangrike en unieke toeriste-aantreklikheid, terwyl dit ook ’n bron van inkomste vir die buro is. Volgens Ferguson wou die palings reeds die vorige week nie uitkom wanneer hulle gevoer word nie. Die paling wat laas Maandag leweloos gevind is, is in die gesig gebyt, terwyl daar ook naelkrapmerke op sy lyf was. Die klippe in die dam was deurmekaar gewoel, wat daarop kan dui dat daar ’n gestoeiery in die water kon wees. Jean du Plessis van natuurbewaring het Dinsdag twee hokke by die palinggat opgerig, waarvan die een binne en die ander buite die huidige omheining is. Hy het ook die mis van die dier as dié van ’n otter geïdentifiseer. Die toerismebestuur was nou genoop om ’n elektriese heining by die palinggat op te rig en het die nodige skenkings daarvoor ontvang. Dit is Maandag 26 Maart opgerig. Intussen gaan alles normaal voort en word die palings steeds gevoer, terwyl die museums en gewilde teetuin ook deur toeriste en plaaslike inwoners besoek word.