Vrou met Mandrax aangekeer
HEIDELBERG Borgtog van R10 000 is aan ’n 26-jarige vrou van Mosselbaai op Dinsdag 27 Maart toegestaan nadat sy in die hof verskyn het op aanklag van besit van Mandrax. ’n Ma van ’n drie maande oue baba is die oggend om ongeveer 02:20 gearresteer toe die polisie die taxi waarin sy ’n passasier was, by ’n padblokkade op die N2 afgetrek en deursoek het. Daar is beslag gelê op ongeveer 2 200 Mandrax-tablette ter waarde van R220 000 wat tussen die baba se klere versteek was. Sy is op die toneel gearresteer en toegesluit. Die baba was saam met haar. Haar borgtog is later die middag deur ’n onbekende man van Mosselbaai, vermoedelik ’n buitelander, betaal. Sy verskyn weer op 26 Mei in die hof. Intussen het die polisie ook ’n man gearresteer nadat daar op twee daggaplante, onderskeidelik 1,5 en 2 meter hoog beslag gelê is. Die 30-jarige beskuldigde is op die plaas, waar hy vermoedelik werk gearresteer, nadat die polisie inligting ontvang en konst. Gershwin Hartnick dit ondersoek het. Die daggaplante is in die beskuldigde se tuin by sy huis gevind. Hy het Dinsdag 27 Maart in die hof op aanklag van die kweek van dagga verskyn en is op waarskuwing vrygelaat. Hy moet weer op Maandag 9 April in die hof verskyn. Adjudant-offisier Alroy Windvogel, plaaslike polisiewoordvoerder rig ’n waarskuwing aan alle dwelmhandelaars dat streng teen hulle opgetree sal word. Hy het sy dank en waardering teenoor die D-skofpersoneel, onder leiding van sers. Daniel Moos uitgespreek om veral dié euwel hok te slaan.