Mandeladag vieringe
HEIDELBERG Hierdie dorp het ook Mandeladag gevier en verskeie instansies asook individue het op Woensdag 18 Julie hul deel bygedra. Verskeie take waaronder die skoonmaak van instansies se persele en om honger magies met lekker warm sop en ’n toebroodjies te vul, was aan die orde van die dag. Sue Gomes-Luis, eienaar en bestuurder van ’n supermark het besluit om die gesegde, “charity begins at home” inderdaad op hul werkers toe te pas. Om die bekende ikoon se geboortedag te vier het 74 werknemers ‘n gelykstaande bedrag ontvang. ’n Spesiale koek is gebak om Madiba se verjaarsdag te vier. Die eerste 100 kliënte het ’n stukkie koek, saam met ’n koppie sop gekry. Magdalena Lotz, was die eerste gelukkige kliënte. Cassie Koen, eienaar van een van Heidelberg se bekendste viswinkels, het sy deel bygedra deur ’n lekker bord kerrie-en-rys, nie net aan sy gereelde klante te gee nie, maar ook aan die vele mindergegoede inwoners van die dorp. Janette du Plessis en Jacky Gildenhuys van Heidelbergbiblioteek het die oggend koek en tee aan die eerste 100 besoekers voorgesit. Later die middag het hulle ook sop en toebroodjies aan behoeftiges gegee. Duivenhoks-biblioteek se personeel, Lizomene Hendricks, Johan Williams en Volenté Hoogbaard het die seniors van die senior burgerklub met voordrag en sangitems in tradisionele drag, vermaak. Dit was tydens ’n funksie van die Kleine Pikkewyne-kleuterskool in die Duivenhoks-gemeenskapsaal.