Chaos na eindfluitjie blaas
HEIDELBERG Die eindfluitjie het Saterdag 21 Julie skaars geblaas toe daar chaos onder die skare uitbreek. Plaaslike rugbyklub, Heibi, soos hulle bekend is, en Bridgton-rugbyklub van Oudtshoorn het op dié dag kragte gemeet. Die toekenning van Bridgton se “wendrie”, het die humeure laat opvlam. ’n Paar ondersteuners het die veld betree om hul misnoeë aan die skeidsregter kenne te gee. Chaos het uitgebreek en die polisie moes ingeroep word om die skeidsregter, een lynregter en Hennie Baartman, SWDRUpresident, na veiligheid te neem. Verskeie ondersteuners het beledigings na veral die twee beamptes geslinger. Baartman is daarvan beskuldig dat hy as president van die unie, nie aan Heidelberg se pleidooi vir ’n ander skeidsregter, voldoen het nie. Die ontevredenheid het onder die tuisspan se ondersteuners ontstaan omdat die skeidsregter, wat die eerste span se wedstryd hanteer het, glo swak beslissings tydens Saterdag se wedstryd gemaak het. Dit is nie die eerste keer wat die tuisskare en die klub ontevrede is met dié beampte se hantering van wedstryde nie. In ’n vorige wedstryd is die beampte se hantering van die wedstryd ook bevraagteken, deurdat hy blykbaar die tuisspan benadeel het. Volgens die plaaslike klub het hulle die vorige week verskeie skrywes aan die skeidsregtersvereniging gestuur om hul ontevredenheid met die betrokke skeidsregter te opper. Dit het egter op dowe ore geval. Baartman het aan Suid-Kaap Forum se korrespondent bevestig, dat hy van so ’n skrywe bewus is, maar hom geensins met die aanstelling van wedstrydbeamptes bemoei nie. Hy het ook bevestig dat hy op geen stadium fisies aangerand is nie. “Daar was wel een ondersteuner wat ‘n hou na my gemik het,” het hy gesê. Volgens Baartman, is hy baie teleurgesteld in die optrede van Heidelberg se voorsitter, Julian Buis, wat volgens hom nie onpartydig optree nie. Baartman voeg by: “Die wettige prosesse sal gevolg word en sal daar na ’n regverdige verhoor uitsluitsel gegee word.” Hy het ook laat blyk dat die wedstryd
Hy het ook laat blyk dat die wedstryd in ’n goeie gees gespeel is, maar dat slegs ’n handjie vol ondersteuners die oorsaak van die chaos was. Volgens Buis gaan hulle nie met die media in gesprek tree nie en wag hulle tot daar volgens die grondwet se prosedure opgetree word. Hulle het hul verslag aan die unie voorsien.
DIE TOESKOUERS SÊ
• Baie van die toeskouers het alkohol gebruik. • Glase en bottels is na die lynregter en skeidsregter gegooi. • Toeskouers moenie toegelaat word om drank in te bring en langs die veld te drink nie. • Baie het nie die wedstryd klaar gekyk nie, juis omdat dit té oproerig geraak het. • Wanneer jy met ’n spesifieke skeidsregter ontevrede is, waarom almal se lewe in gevaar stel? • Dit is hartseer om te sien in watter toestand die sportgronde nou na dié oproer is.