Welverdiende erkenning aan ’n merkwaardige vrou
Een van die dorp se oudste en bekende opvoeders het Maandag 30 Julie ’n welverdiende erkenning vanaf die munisipaliteit gekry. Shirley Swartbooi (80), oudonderwyser en stigter van Kleine Pikkewyne-kleuterskool is met ’n sertifikaat van verdienstelikheid deur die uitvoerende burgemeester van Hessequa, Grant Riddles, vir haar getroue diens beloon. Sy het na haar uittrede as opvoeder by De Waalville Primêr die kleuterskool in 1997 by haar huis in Nerinalaan begin. Sy het einde verlede jaar as prinsipaal van die skool afgetree. Dottie Page, wat saam met Swartbooi die kleuterskool begin het, is as prinsipaal bevorder. Dié erkenning is deur Page en die beheerliggaam van die skool geïnisieer om amptelik hulde aan dié passievolle opvoeder te bring wat die skool uit eie sak begin het. Tom Pretorius, wyksraadslid en Annelene Hartnick, voormalige wyksraadslid, asook lede van die beheerliggaam was teenwoordig tydens die verrigtinge by die skool. Riddles het aan Page en die bestuur verskoning gevra omdat hy nie vroeër aan hul versoek kon voldoen nie. Hy het hulle bedank vir die inisiatief geneem om Swartbooi erkenning te gee. “Ons moet mense erkenning gee terwyl hulle leef om ons waardering vir hul bydrae in die gemeenskap te wys.” Swartbooi het haar dank en waardering aan Riddles, Page, Hartnick, Pretorius en die bestuurslede uitgespreek. Hartnick het benadruk dat sy bevoorreg is om deel te wees van so ’n merkwaardige vrou se nalatenskap. “Juffrou het ’n baie positiewe bydrae tot die gemeenskap oor die jare gemaak. Geniet die rus.” Pretorius het vir Swartbooi bedank vir haar bydrae tot die opbou van die gemeenskap. “U stel ’n voorbeeld aan ons dat aanhouer wen. Namens die gemeenskap baie dankie en voorspoed vir die toekoms.” Die verrigtinge is met verversings afgesluit.