Onderwyser se borgtogvoorwaardes verskerp
Volgens die staat is daar nog baie verklarings van ander leerders, asook oudleerders wat verkry moet word.
HEIDELBERG Die 61-jarige onderwyser wat daarvan aangekla word dat hy na bewering ’n leerder op 30 Julie seksueel by die skool se koshuis aangerand het, se borgtogvoorwaardes is Vrydag 16 November verskerp. Die beskuldigde se prokureur het die hof gevra om sy borgtogvoorwaardes te verslap om hom toe te laat om by die koshuis vanaf 14 Desember tot 4 Januarie tuis te gaan. Dít, volgens hom was sodat hy sy vrou kon help inpak, aangesien hulle die perseel teen einde Desember moet ontruim. Ter ondersteuning om die voorwaardes te verskerp, het die ondersoekbeampte gesê dat die staat nagelaat het om die hof in te lig dat die misdryf volgens Art 54 van die seksuele misdaadwet onmiddellik aangemeld moes word. Hy het bygevoeg dat dit ’n bylae 5 misdryf is en dat die hof dit in ’n ernstige lig moet beskou. Volgens hom is daar ’n sterk saak teen die beskuldigde en dat hy nog dieselfde dag ’n aansoek vir beslagneming van sekere eiendom aan die hof sou rig. Volgens die staat is daar nog baie verklarings van ander leerders, asook oudleerders wat verkry moet word. Dit sal volgens die ondersoekbeampte nog redelik tyd in beslag neem, omdat van die leerders met hul eindeksamens besig is. Michael Waweni, ’n inwoner van Slangrivier en gemeenskapaktivis teen vroue en kindermishandeling het ’n petisie aan die staat oorhandig ter ondersteuning vir die verskerping van die borgtogvoorwaardes. Die landdros, Brenda Roodt, het gesê dat dit nie in belang van geregtigheid is dat die beskuldigde in Heidelberg moet wees nie en is hy belet om in die landdrosdistrik van dié dorp te wees, behalwe wanneer hy in die hof moet verskyn. Die saak is tot 28 Januarie 2019 uitgestel. Charlton Pretorius is die staatsaanklaer. Die beskuldigde is steeds op eie verantwoordelikheid uit en is nou in Caledon woonagtig.