Dwelms van strate af
Vermeende dwelmhandelaars wat beplan het om 'n besending dwelms in Albertinia af te lewer, se planne is Saterdag, 4 Julie omstreeks 17:30 deur die Langeberg K9 honde-eenheid in die wiele gery.
Sersant JM Spangenberg van K9 vertel dat hy inligting uit die gemeenskap ontvang het dat 'n spesifieke voertuig, afkomstig van Mosselbaai dwelms op 'n gereelde basis aan plaaslike handelaars lewer.
"Ek het die voertuig sowat 5km voor Albertinia opgemerk en agternagesit. Die bestuurder het my opdrag om die voertuig tot stilstand te bring, geïgnoreer en het sy snelheid verhoog. Die passasier het twee keer voorwerpe uit die voertuig gegooi voor dit later, met behulp van die Albertinia-polisie tot stilstand gebring is," verduidelik hy. Spangenberg, wat ook 'n dwelmhondgeleier is en sy dwelmhond, Donna het die voorwerpe wat tydens die jaagtog uitgegooi is, opgespoor. Sy hond het positief reageer by twee plastieksakkies wat met mandraxtablette gevul is was.” Die 75 tablette het 'n straatwaarde van R6 000.
Beide verdagtes is in hegtenis geneem op aanklagtes van handeldryf in mandrax, of die alternatief, besit van mandrax. Hulle is Maandag, 6 Julie vrygelaat, hangende die uitslag van die dwelm forensiese verslae.
"Ek is dankbaar dat die mense uit die gemeenskap my in hul vertroue geneem het met die inligting wat tot die twee arrestasies gelei het. Dis egter belangrik dat inwoners op die uitkyk moet wees vir enige vorm van onreëlmatighede sodat ons hierdie dwelm-euwel uit ons gemeenskappe kan dryf," maan hy. Adjudant-offisier Daniel Prins, eenheidsbevoerder het Spangenberg bedank vir sy toegewydheid en die verskil wat hy in die Hessequa-streek maak wat dwelmverwante sake betref.