Kwarantynfasiliteit by karavaanpark
Berigte op sosiale media doen die rondte dat Swellendam-munisipaliteit nie aan protokolle voldoen vir ontsmetting en higiëne met betrekking tot Covid19-regulasies in een van die aangewese kwarantynfasiliteite nie, naamlik die Swellendam-karavaanpark.
Volgens Bianca McKechnie, senior media- en kommunikasiebeampte van die munisipaliteit is die karavaanpark vanaf die begin van die verklaarde nasionale ramptoestand op 15 Maart en die gevolglike staat van inperking wat op 26 Maart begin het, ingevolge die Wet op Rampbestuur as ’n kwarantynfasiliteit aangewys. "Die doel van die fasiliteit is om as ’n afsonderingsfasiliteit te dien vir diegene wat asimptomaties is of geringe simptome het, maar nie in staat is om hulself tuis af te sonder nie. Elke eenheid by die karavaanpark word deeglik skoongemaak en ontsmet voor inwoners ingeteken word, asook ná hulle vertrek," verduidelik sy.
Basiese skoonmaakmiddels en –toerusting word intussen in elke eenheid aan individue voorsien om na die algemene skoonmaak van badkamers om te sien. ’n Opsigter en munisipale amptenaar is in die karavaanpark tot inwoners se beskikking om voedsel af te lewer wat deur die munisipaliteit voorsien word, asook items soos toiletpapier en skoonmaakmiddels indien voorraad sou opraak.
Omdat die munisipaliteit ’n diens vir daaglikse maaltye lewer, word dit in weggooibare houers met weggooibare eetgerei voorsien. Dit word dadelik na gebruik verwyder. Derhalwe word skoonmaakmiddels vir die kombuis nie voorsien nie, aangesien herbruikbare kooken eetgerei nie verskaf word nie. "Indien inwoners items vir persoonlike higiëne benodig of hul tyd in afsondering weg van gesinslede moet deurbring, kan dit ook gereël word met die amptenaar wat die fasiliteit en sy inwoners bestuur."
Gegewe die feit dat inwoners in hul kamers en eenhede móét bly, is die deeglike skoonmaak en ontsmetting van eenhede nie nodig terwyl inwoners in kwarantyn is nie, maar slegs na hulle die perseel verlaat het aan die einde van hul afsonderingstydperk van twee weke en na hulle deur die bestuurspan van Swellendam-hospitaal as gesond verklaar is. Alle inwoners is, waar moontlik, verantwoordelik vir die skoonmaak van hul eie kamers en eenhede.