Alma Park ontwikkel in ’n pragbuurt
Neffens die Alma-kliniek is ‘n voorkeur woonbuurt, Alma Park stadig besig om gestalte te kry. Met 33 nuwe wonings reeds voltooi en ‘n verdere 40 in aanbou, is daar nog 24 huiseienaars wat na die sooispit van hul eie, nuwe wonings uitsien.
Uiteindelik sal 97 nuwe huiseienaars by die ontwikkeling baat vind.
In 2017 is daar met verkoop van erwe begin teen 50% van die waarde soos deur die munisipale raad besluit is. Die koopsom was sowat R52 500. Die raad het ook bepaal dat die eiendomme teen ‘n minimum waarde van R210 000 opgerig moet word. Tans spog die ontwikkeling met heelwat huise wat die minimumwaardasie by verre oorskrei.
Die nuwe eienaars is drie jaar gegun ná registrasie om met die bouwerk aan hul huise te begin en in gevalle waar nog nie met bouwerk begin is nie, het die munisipaliteit skrywes uitgestuur om stukrag aan die proses te gee. Waar nodig, mag die munisipaliteit gebruik maak van die terugvalklousule om erwe teen die oorspronklike prys terug te neem om weer te bemark sodat die geleentheid vir behuising in hierdie prag-woonbuurt ten volle benut mag word.
Verskeie eienaars het die bouwerk van hul droomhuise self hanteer, hoewel 16 van die huise deur ‘n ontwikkelaar vir bekostigbare behuising opgerig is. In hierdie geval is erwe per ope tender aan die ontwikkelaar toegeken en kon enige familie wat wel kwalifiseer van die ontwikkelaar gebruik maak.
Die projek, wat in 2008 reeds deur die raad aanvaar en goedgekeur is, nader nou vinnig voltooiing nadat die ontwikkeling van die erwe en die nodige dienste in fases deur die munisipaliteit en namate fondse deur die raad bewillig is, afgehandel is.
“Hierdie ontwikkeling is maar een voorbeeld van die sukses waarmee behuising vir alle inkomstegroepe in die groter Mosselbaai bewillig word.
Mosselbaai-munisipaliteit wens die nuwe huiseienaars jarelange vreugde in hul nuwe wonings toe,” sê die uitvoerende burgemeester, Harry Levendal.