Goeie resultate na WP/SWDoefenlopie
Terwyl die meeste dorpe na ‘n bietjie klubrugby smag, het Heidelberg besoek van ‘n WP 15-tal gekry wat in ‘n opwarmingswedstryd teen ‘n SWD 15-tal op Heidelberg kom speel het.
Daar was streng maatreëls. Geen toeskouers is toegelaat nie, die pad voor die pawiljoen was afgesper en sekuriteitspersoneel was oral te sien.
Die wedstryd was inderdaad ‘n oefenlopie vir beide spanne. Spelers was deurlopend in verskeie posisies geskuif, terwyl van die bank af gereeld vars spelers ander vervang het.
Die WP-spelers het met hul vinnige agterlynspelers die SWD gedurig onder geweldige druk geplaas en moes hulle kwaai wal gooi. Tog het die agttal hul man goed gestaan in die eerste 12 minute.
In die vaste losspel het Roelfse en Duke Jantjies gewoel en ‘n bars verdedig teen hul jonger en beweegliker teenstanders. Na 15 minute het die WP se agterlyn-blitse vir eerste drie oorgegaan.
Adi Jacobs op regtervleuel was regs geskuif om die blitse te probeer keer. Hoewel sy verdediging rotsvas was, het ‘n ander blits elders opgeduik en so SWD se verdediging tot die uiterste beproef.
WP se binne senter, Emmanuel Tsivambu het gate in die SWD se agterlyn laat oopgaan met swenke en lyne wat telkens verander het. Die WP drieë was die een na die ander ingeryg soos die Kapenaars die swak plekke van SWD begin uitbuit het.
Met die toevoeging van SWD-kaptein en binnesenter in die laaste 20 minute het die SWD skielik begeesterd begin speel, lynstane gewen en beter begin skrum ook. Drieë is toe aangeteken deur vaste voorspeler Roelfse, terwyl Jacobs beloon is vir sy goeie spel op vleuel met ‘n drie in die hoek, na ‘n volle lynbeweging.
Die tellings was nie belangrik nie, aangesien die wedstryd slegs as oefenlopie gedien het, met vele wateronderbrekings om veranderings aan die spanne te maak. Beide spanne se afrigters kan terugkeer na die oefenvelde met goeie idees hoe die span in die verskillende fasette gevaar het onder wedstryddruk.
En agter die draad, ‘n ent van die veld af, kon die rugbydorstiges darem ietsie te siene kry van hul geliefde spel.