‘Dis nou jóú huis,’ sê Onrust
“Dit is nie meer die munisipaliteit se huis nie. Jy is nou die regmatige eienaar,” het Chris Onrust, direkteur van gemeenskapsdienste by Hessequamunisipaliteit bevestig toe nóg 13 titelaktes aan Riversdallers by ‘n geleentheid by die Thusong-sentrum op die dorp oorhandig is.
Altesaam 101 begunstigdes in die Hessequa-streek het gedurende Junie die goeie nuus gekry dat hulle nou huiseienaarskap verwerf het, waarvan 39 titelaktes tussen 4 en 7 Junie oorhandig is.
“Jy het net drie dinge nodig om ‘n vreugdevolle huis te skep: liefde, vrede en omgee,” het die uitvoerende burgemeester, Grant Riddles gesê.
“Moet nooit vir jou huis kwaad word nie en toon áltyd respek,” het Cyprian Duthie van menslike nedersettings daaraan toegevoeg, waarna ‘n praktiese inligtingsvideo oor die verpligtinge van huiseienaarskap aan die begunstigdes vertoon is.
Raadslid Tinus van den Berg (tegniese dienste) het die huiseienaars aangemoedig om die titelakte-dokumente in veilige bewaring by ‘n bank of prokureur te berg, ‘n testament te laat opstel en ‘n erfgenaam aan te wys om toekomstige onmin en verwarring te verhinder.
Die verskeie sprekers, met inbegrip van rdl Ben Smit (finansiële dienste en korporatiewe bestuur) het beklemtoon dit kan tot R6 000 kos om die titelakte-dokumente te vervang en daardie koste sal deur die huiseienaars betaal moet word.
‘n Paar van die trotse ontvangers van die titelaktes het telkens gevra of dit nou regtig nie meer die munisipaliteit se huis is nie. Hulle is onomwonde verseker: “Dis nou jóu eiendom!” Van die 101 titelaktes wat gereed is vir oorhandiging, is die volgende titelaktes van 4 tot 7 Junie in die Hessequa-streek oorhandig: Albertinia - 21; Melkhoutfontein - 4; Heidelberg - 1; Riversdal - 13.
Meer as 1 500 titelaktes is sedert 2016 aan huisbewoners in die streek uitgereik. Daar is steeds ‘n reuse agterstand wat aangespreek en afgehandel moet word.