Haakplekke met inenting krap om
Met die eerste week van inenting teen Covid-19 by verskeie punte in Mosselbaai agter die rug, is daar gemengde reaksie vanuit die gemeenskap ontvang. Hoewel die Mossel Bay Advertiser via sosiale media positiewe terugvoering ontvang het, was daar etlike klagtes van oues wat onverrigter sake, na ure se wag, huis toe gestuur is.
Bejaardes het op Maandag, 14 Junie in lang rye by die D'Almeida-gemeenskapsaal gestaan waar van die meeste probleme gerapporteer is. Klagtes was onder meer dat geen sanitering gedoen is nie en dat sosiale afstand ook nie gehou is nie. Klaarblyklik het die wagtendes mekaar self begin organiseer en aan mekaar nommers begin toeken. Dit was in die geval van persone wat nie 'n formele afspraak gehad het nie en moontlik in aanmerking kon kom vir van die oortollige entstowwe toegeken. Die
Advertiser het ook verneem dat sommige pasiënte hulle afspraaknommers, 'n unieke kode, met ander gedeel het wat tot gevolg gehad het dat entstowwe voortydig opgeraak het.
Van diegene wat Maandag by D'Almeida 'n bloutjie geloop het, het op Dinsdag na Alma-kliniek geskuif en vanaf 06:30 daar gewag nadat inligting ontvang is dat pasiënte sonder 'n afspraak ingeënt sou kon word.
"Teen 10:30 het 'n personeellid na ons toe gekom en gesê sy het sopas 'n boodskap ontvang dat geen pasiënte sonder afspraak ingeënt sal word nie. Nie dié week nie en ook nie volgende week nie. Ons is almal huis toe gestuur."
Toestroming
Volgens Nadia Ferreira, woordvoerder van die Wes-Kaapse departement van gesondheid, ervaar die sub-distrik tans ‘n groot toestroming na inentingspersele van mense wat nie afsprake het nie.
"Ons het begrip vir die publiek se angstigheid om die inenting te ontvang. Ons inentingspersele gee voorkeur aan persone met afsprake. Dit is diegene wat hulle tweede SMS gekry het met hul afspraakbesonderhede en unieke kode. Eers hierna kan ons instapkliënte help indien ons entstof oor het vir daardie bepaalde dag."
Ferreira het ook gesê dat hulle sover moontlik poog om mense op ‘n veilige afstand van mekaar te hou deur stoele uit mekaar te pak waar hulle kan sit en wag.
Wat betref die deel van unieke kodes, het Ferreira gesê dat dit vir die departement tot groot kommer is.
"Ons het opgelet dat mense met unieke kodes vir inentings kom wat nie aan hulle toegeken is nie. Dit beteken as ons die identifteitsnommer met die unieke kode vergelyk, is dit nie dieselfde persoon nie. Ons het die eerste 4 mense tegemoet gekom en hulle korrekte unieke kodes gegee aangesien ons nie bewus was van die situasie nie. Almal wat werklik afsprake gehad het, het wel hulle inenting ontvang.
"Ons vra dat die mense asseblief nie hul unieke kode met ander mense deel nie. Indien jy geregistreer het en later besluit om nie meer die inenting te kry nie, mag jy nie die unieke kode vir iemand anders gee nie. Die stelse sal wel na jou derde afspraak wat gemis is, jou registrasie kanselleer. Ons doen egter ‘n ernstige beroep op mense om hul afsprake na te kom," het Ferreira afgesluit.