Bordjies word verhang
Die talle reklameborde langs Hessequa se hoofpaaie, sowel as langs die N2, is onwettig.
SANRAL het bevestig dat die borde, of te wel billboards, onwettig opgesit is na ‘n anonieme skrywer van Albertinia by SuidKaap Forum gekla het oor die toename in dié onooglike reuseadvertensies.
“Vir jare sien ek hoe die onwettige advertensievertoonborde (billboards) die hoofpaaie in Hessequa ontsier,” lui die brief. “Onlangs verskyn daar toe die eerste Coke-advertensiebord langs die N2 hier voor Albertinia. Wat is volgende? Bier- en drankadvertensieborde? Ons het reeds kitskosrestaurantborde.”
Maar dit het nie net by die N2 gebly nie. “Op pad Stilbaai toe verskyn die een eiendomsagentbord op die ander tot jy nou by Droëvlakte ‘n allesoorheersende bord van seker 10 vk/meter kry. Dit beteken seker dat die ander 20 agente in Stilbaai dieselfde grootte borde mag opsit.”
Reklameborde vervuil ook die N2 by Riversdal en Heidelberg. “Hessequa moet seker die mees onooglike landskapuitsig langs sy hoofpaaie in die hele Wes-Kaap hê. Ek reis heelwat en daar is geen ander munisipaliteit waar daar so ‘n groot aantal borde voorkom nie.
“My vrae aan die munisipaliteit: Is hierdie borde almal goedgekeur in terme van u regulasies? Indien nie, wat gaan u daaraan doen om weer die pragtige landelike beeld van ons streek, in teenstelling met die opgeblaasde en harde Las Vegas-vertoning, vir die inwoners en reisende publiek terug te bring? Hierdie is nie toeristeinligtingstekens nie, maar banale advertensieborde vir besighede.”
Hy het sy kommer uitgespreek dat sy skrywe nie enige effek sal hê nie en dat die status quo blywend van aard sal wees.
Hessequa-munispaliteit se munisipale woordvoerder, Didi Budricks, sê die munisipaliteit is nie die magtigende owerheid vir advertensieborde langs nasionale en provinsiale paaie nie.
“Langs die N2 is dit SANRAL en langs provinsiale paaie is dit die Wes-Kaapse distrikspadingenieur van die departement openbare werke en paaie.”
Melany Kuhn, strategiese kommunikasie EMEA (Europa, Midde-Ooste en Afrika), sê SANRAL maak ten sterkste beswaar teen die ongemagtigde advertensieborde wat langs die N2 buite die padreserwe aangebring is.
“Ons het Hessequa-munisipaliteit in dié verband genader. SANRAL is besig om ‘n opname te doen om die omvang van die oortredings te beoordeel en sal binnekort alle oortreders van ‘n verwyderingskennisgewing bedien.” Dit sluit die onlangse advertensieborde in wat in die Albertiniaomgewing aangebring is, wat minstens 18 m2 groot is.
“SANRAL werk saam met die munisipaliteit om toegang tot privaatgrond te vergemaklik omdat ons nie beheer daaroor het nie, waar die oprigting van onwettige advertensieborde in stryd is met beide munisipale verordeninge en SANRAL se regulasies vir buitelugreklame wat op nasionale paaie vertoon word.”