Stormsterk wind rig groot skade aan
Groot skade is gedurende die oggendure van Woensdag, 30 Junie deur sterk rukwinde op Mosselbaai en omliggende gebiede aangerig. Dit volg nadat ‘n vlak 6 waarskuwing van sterk wind deur die SuidAfrikaanse Weerdiens uitgereik is.
Kort nadat ‘n stormsterk wind vanaf omstreeks 03:00 in die groter Mosselbaai begin tier het, het inwoners van verskeie buurte foto’s van en kommentaar oor die skade op sosialemedianetwerke begin laai. Sover bekend, is niemand tydens die storm beseer nie.
Volgens berigte, het die wind by tye teen ‘n snelheid van meer as 108 kilometer per uur gewaai.
Wat die tasbare skade betref, aangerig oor ‘n wye gebied binne die groter Mosselbaai van KwaNonqaba tot Hartenbos Heuwels, is berigte ontvang oor dakplate, -kappe en -teëls wat afgewaai is. Afdakke wat by sommige huise ingemessel was is uitgeruk en bome het deurgeloop deurdat dit omgewaai of takke deur die krag van die wind afgeskeur is. Uit Danabaai is berig dat ‘n mobiele toilet tot in die pad geslinger is en by ‘n gastehuis in Mosselbaai is die tuinmeubels in die swembad gewaai. In Groot-Brakriver is minstens een gesin heeltemal dakloos gelaat.
Berigte oor skade op boupersele is ook ontvang en in Mossdustria, moes ‘n kontrakteur kwotasies doen op industriële deure wat beskadig is. By privaat wonings, is berig dat inhangshekke uit posisie en tot selfs op padoppervlaktes gewaai is. Skade op boupersele is aangemeld, insluitend mure, asook ‘n skoorsteen wat omgewaai is.
Motoriste wat Woensdagoggend op pad werk toe was, het takke en ander versperrings, selfs klippe op die padoppervlak gevind.
Buurtwagggroepe asook spanne van die Mosselbaai-munisipaliteit het gehelp met die opruimingswerk.
Volgens die munisipale woordvoerder, Nickey le Roux, kon ’n waardebepaling van die skade nog nie gedoen word nie.
“Kragonderbrekings is aangemeld in Groot-Brakrivier en elders wat dringend herstel is. Daar het wel ook kragonderbrekings in die Boggomsbaai / Vleesbaaiomgewing voorgekom, wat aan Eskom gerapporteer is aangesien hul krag direk van die kragvoorsiener af kom. Personeel van die infrastruktuurdirektoraat het inwoners met sandsakke bygestaan in gevalle waar huise se dakplate los of beskadig was.”
Raadsheer Dirk Kotzé, waarnemende burgemeester het sy dank uitgespreek teenoor die waarnemende munisipale bestuurder, Colin Puren, vir die wyse waarop interim-noodleniging gedoen word aan inwoners wie se huise se dakke algeheel of feitlik geheel in die slag tydens die stormwind gebly het.
Kotzé het ook sy dank uitgespreek teenoor die Rotariër-klub, Mosselbaai Tafelronde en die Mosselbaai Besigheidskamer vir hul borgskap om materiaal te befonds vir die hulpverlening.
“Personeel van die direktoraat gemeenskapsdienste help om bouersplastiek versprei sodat die inwoners wat absoluut dringende hulp benodig teen die elemente beskerm kan word.
Die munisipaliteit se dank ook teenoor die verskaffers wat die voorraad teen ‘n afslagprys beskikbaar gestel het.”