Slakkepos se geskiedkundige wortels gedenk
Op dieselfde dag wat Mosselbaai se poskantoor in Marshstraat gesluit was vir ontsmetting vanweë Covid-19, het die eerste “poskantoor” op die dorp verjaar. Die FAK het dié besonderse dag, 7 Julie op hulle Facebookblad gedenk met een van hulle
Vandag in die geskiedenis-inskrywings.
Die Posboom by die Dias Museum word allerweë beskou as die oudste poskantoor in Suid-Afrika.
Volgens die FAK se inskrywing, was Joas da Nova ’n Portugese seevaarder op pad na Indië toe hy op 7 Julie 1501 briewe en dokumente in ’n skoen wat aan ’n groot melkhoutboom naby die huidige Mosselbaai gehang het, gevind het. Verder word verduidelik dat die briewe deur een van die bevelvoerders van die boot van Pedro Alvares Gabral in die jaar 1500 in daardie skoen aan die historiese boom geplaas om daardeur boodskappe en inligting aan verbygaande skepe oor te dra. Omdat die Portugese toe reeds om die Suidpunt van
Afrika geseil het nadat Bartholomeu Dias en Vasco da Gama die seeweg na die Ooste vasgestel het, word die melkhoutboom derhalwe as die oudste poskantoor in Suid-Afrika beskou.
Aangesien die Dias Museum vandeesweek gesluit was vanweë die vlak-4-inperking, kon geskiedenisliefhebbers nie hierdie besonderse mypaal van 520 jaar vier nie, maar lede van die plaaslike FAK Kultuurnetwerk kon darem die geskiedkundige oomblik met 'n foto verewig.
* Bronne: https:// www.facebook.com/ FAK01/?ref=page_ internal en http:// monument-sa. co.za/dias-museumposkantoorboom-mosselbaai/