Van Dyk mik vir goud by Spele
Heidelberg, ‘n dorp wat bekendheid as die mekka van toneelspel verwerf het en ook as die poort tot die Tuinroete bekend is, staan op die drumpel daarvan om eersdaags sy eerste Olimpiese wenner op te lewer.
Jo-Ané, dogter van Johan en Marjo van Dyk van die plaas Karringmelksrivier net buite die dorp, het die Suid-Afrikaanse Olimpiese span as spiesgooier behaal. Dié oud-leerder van Hoërskool Heidelberg het vanaf graad 1 tot 8 as uithaleratleet en veelvoudige sportster uitgeblink.
Sy het haar hoërskoolloopbaan aan Hoërskool Outeniqua voltooi.
Reeds sedert haar laerskooldae het Jo-Ané verskeie nasionale spanne verteenwoordig, maar het haar vanaf graad 11 op spiesgooi toegespits. Sy praat met groot lof van haar skoolafrigter, Nardus Potgieter van Riversdal aan wie sy baie verskuldig is.
Sedert 2016 het sy aan die Noordwes Universiteit, Potchefstroomkampus begin studeer, waar sy onder Tertius Liebenberg haar talent verder ontwikkel het. Sy spog met ‘n persoonlike beste afstand van 61.19 meter, wat sy onlangs in die Tseggiese Republiek verwerf het. Dit is net ongeveer 11 meter buite beide die Olimpiese en wêreldrekords. Die wêreldrekord is 72.28m en die Olimpiese rekord is 71.53m.
Volgens Jo-Ané oefen sy ongeveer twee ure per dag, vyf tot ses dae ‘n week. Sy is vol vertroue dat sy die kwalifiserende rondte sal bemeester en onder die top 12 wees om vir die gesogte medaljes mee te ding. Sy glo dat sy die huidige wêreldkampioen, Kelsey-Lee Barber “a
run for her money” kan gee.
Die talentvolle sportvrou het nie toegelaat dat die Covid-19-inperking haar laat onder kry nie. Inteendeel, dit het haar net meer gefokus gemaak, veral wanneer sy by die huis op die plaas was. Sy het ook haar BSc-graad in dieetkunde in April vanjaar verwerf en werk as dieetkundige by die Witrand psigiatriese hospitaal in Gauteng.
Jo-Ané en die span vlieg op 21 Julie na Tokio, waar sy hopelik op 3 Augustus die gesogte goue medalje trots omhoog sal kan hou.