Voortgesette onrus in oënskou
Hessequa-munisipaliteit het op Donderdag, 15 Julie ‘n dringende vergadering met lede van die Hessequa-veiligheidskomitee belê om die voortgesette onrus wat tans in ander dele van Suid-Afrika afspeel, onder die loep te neem en die vlak van gereedheid indien soortgelyke onrus in dié streek sou plaasvind.
Die vergadering was onder andere deur die uitvoerende burgemeester, Grant Riddles, die speaker, Andrew Stroebel, die portefeuljevoorsitter vir gemeenskapsdienste, Heinrich Hartnick, stasiebevelvoerders van al vier polisiestasies, gemeenskapspolisieforumlede, sowel as verskeie buurt- en plaaswagverteenwoordigers bygewoon.
Riddles het ‘n beroep op inwoners gedoen om kalm te bly.
“Hoewel daar nog geen gevalle van plundering of onrus in ons munisipale gebied aangemeld is nie, is die munisipaliteit slaggereed om enige gebeurlikheid aan te spreek.”
Elke bevelvoerder het geleentheid gehad om oorhoofs ‘n aanduiding te gee van hul onderskeie gebeurlikheidsbeplanning en vroeë waarskuwingstelsels, so ook munisipale verteenwoordigers, buurt-/ plaaswagte en gemeenskapspolisieforumlede. Almal het bevestig dat hul slaggereed vir enige gebeurlikheid is en dat die gemeenskap in die verband gemoedsrus kan hê. Privaatsektor rolspelers soos sekuriteitsmaatskappye is ook aan boord en speel ook ‘n moniterings- en aanmeldings rol.
Die munisipale bestuurder, Johan Jacobs doen ‘n dringende beroep op die gemeenskap om nie onbevestigde gerugte en waninligting op sosiale media te versprei nie.
“Maak liefs staat op bevestigde inligting soos deur die veiligheidsgemeenskap en munisipaliteit verskaf. Baie van die video’s en stemnotas wat op sosiale media soos WhatsApp versprei word, is verouderd of nie van ons provinsie nie, of bloot vals nuus wat bedoel is om angs en vrees te wek. Ons moedig inwoners aan om versigtig te wees en om materiaal verantwoordelik te deel,” vra hy.
Riddles het benadruk dat die gemeenskap se veiligheid vir hom belangrik is en daarmee saam die voortgesette stimulering van Hessequa se ekonomie.
Stroebel het bevestig dat die volle raad eenstemmig is dat daar voorkomend opgetree moet word in belang van die breë gemeenskap.
Indien inwoners enige verdagte optrede of voorvalle waarneem, word hulle versoek om hul naaste polisie of 10111 te kontak. Addisioneel kan die Hessequa-beheerkamer se noodnommer (028 713 2222 en 028 713 7917) geskakel word vir enige aanmeldings in die verband.