Reën vertraag opgradering
Die ongerief wat Albertinianers reeds vanaf 13 Mei verduur met ‘n gedeelte van Hoofstraat wat opgegradeer word, is nog nie verby nie.
‘n Voltooiingsdatum van 30 Junie was aanvanklik beoog, wat na 16 Julie verleng is en steeds nie klaar is nie.
Die geaffekteerde gedeeltes is tussen Horne- en Spoorwegstrate, sowel as Spoorweg- tot Van Zylstrate geleë. Die opgraderingswerk behels die installering van randstene aan beide kante, asook die herstel van die padoppervlak met ‘n teerlaag.
Volgens Didi Budricks, munisipale woordvoerder het die bestaande padoppervlak uit soliede beton bestaan.
“Die kontrakteur het op 4 Junie met die werk begin, maar met die opgrawings en voorbereidingswerk van die laagwerke, is waargeneem dat die bestaande rioollyn direk onder die beton gelê is. Die kontrakteur moes sekere gedeeltes met die hand oopmaak om nie die diens te beskadig nie. Omdat die pyp so vlak geleë was, was dit op sekere plekke gekraak as gevolg van die pyp materiale en moes dit herstel word.”
Sy het verder gesê dat die bestaande stormwaterlyn ook gesak moes word, sodat die laagwerke op die korrekte dieptes gelê kon word.
“Daar was ‘n stormwaterkanaal regoor die pad gelê en ‘n waterlyn wat 30mm vlak onder die bestaande laagwerke geleë was. Gedurende Junie was daar verskeie reëndae wat die vordering van die werke verder vertraag het. Met die bou van enige padkonstruksie kan daar nie in nat toestande gewerk word nie en was die materiale op sekere dae na swaar reën, baie nat wat verdere skade aan die pad sou veroorsaak indien die kontrakteur met die laagwerke, sowel as teerwerke sou voortgaan.”
Dit kon later na versakkings in die pad lei indien die materiale onder die teerlaag nie behoorlik droog en reg gekompakteer is nie.
Opgradering van water en riool
Praktiese voltooiing was teen einde 29 Junie bereik.
“Die kontrakteur is tans besig met rehabilitasie/opvulling en teerwerke wat teen 16 Julie voltooi moes wees,” het Budricks gesê. Die reën van die afgelope tyd het egter ook dié projekte se voltooiing redelik vertraag.