Erf 657 nou ‘n rommelhoop
STILBAAI - Die stuk grond tussen die gholfbaan en Jongensfontein-pad, ook bekend as erf 657, is besig om in 'n rommelhoop te ontaard.
Sowat 15 vrywilligers, meestal van die Stilbaai-buurtwag en Coastal Cleanupgroep, het Donderdag 18 April weer met geel sakke die bosse ingevaar en binne twee ure sowat 70 vullissakke vol rommel opgetel.
Dit is 'n gewilde oornagplek vir haweloses, maar daar is duidelike tekens dat sommige op 'n meer permanente basis hul intrek daar geneem het.
Dat daar daadwerklik opgetree moet word voordat hierdie in 'n baie groter probleem ontaard, is baie duidelik.
In 'n groot mate is wetstoepassing se hande afgekap, maar die rolspelers sal 'n oplossing moet vind voordat dit te laat is.
Barmhartige Samaritane sal moet besef dat dit meer skade doen as goed deur klere en geld uit te deel. Werk eerder deur organisasies soos Badisa.
Hessequa-munisipaliteit sal op 'n manier 'n plan moet maak met die swart vullissakke wat naweekgangers Sondae uitsit voordat hulle vertrek.
Daardie sakke kan vir dae staan en wag om opgelaai te word, afhangend van die vullisverwyderingsprogram en die sakke word dan deur haweloses opgepik en op erf 657 uitgegooi op soek na iets bruikbaar of selfs afvalkos.
Inwoners moet nie hulle swart sakke die vorige aand uitsit nie, maar wel die oggend wanneer die vullistrok by hulle verbykom.
Behalwe vir die gesondheids- en veiligheidsrisiko’s, asook die ontstaan van 'n plakkerskamp in Stilbaai, is erf 657 ook 'n unieke stuk aarde met 184 verskillende plantspesies wat hier voorkom.
Ontwikkeling en groei in Stilbaai vind teen 'n fenomenale pas plaas. Groen stroke is egter uiters belangrik in stedelike ontwikkeling.
Central Park in New York is sekerlik een van die gesogste stukke grond in Amerika, maar die stadsvaders behou dit as 'n park waar die inwoners vrylik in die natuur kan ontspan.
Dr. Deon Begemann en die Stilbaaibewaringstrust het reeds wandelpaadjies op erf 657 gevestig en die idee van fietsrypaadjies is ook geopper.
Inwoners kan verder hulle deel doen deur die skoonmaakinisiatiewe van Clifton Donald en die Coastal Cleanup-groep te ondersteun. Help skoonmaak as hulle vra. Dit vat net twee ure van jou tyd en dit is natuurlik ook goeie oefening.