Dié manne toor met hout
STILBAAI - Die Stilbaaihoutwerkgroep bestaan al vir ses jaar en het 15 aktiewe lede.
Een van die lede is nog in ’n voltydse beroep, maar die res is almal afgetredenes wat houtwerk as 'n stokperdjie beoefen.
Dit is 'n informele groep met geen ledegeld en grondwet nie. Die groep kom elke derde Woensdag van die maand bymekaar, waar hulle idees deel, raad vra, masjinerie uitruil en mekaar help waar hulle kan. Hierdie maandelikse byeenkoms word geroteer tussen die lede en word altyd met 'n braai afgesluit.
Die groep beskik oor 'n ongelooflike kennis van houtwerk, maar daar is ook mense wat nog baie kan leer. Sommige het ongelooflike werkwinkels en ander het baie kleiner werkplekke, maar almal het dieselfde passie vir houtwerk.
Die Forum het net by twee werkwinkels ingeloer. Een was Chris Potgieter se plek, wat geheel en al 'n werkwinkel is en spog met heelwat masjinerie. Hy is in die bevoorregte posisie dat hy 'n tafelsaag (sawstop) het, wat dit amper onmoontlik maak om jou vingers of hand te verloor.
Hy het 'n meganisme wat binne 'n millisekonde wanneer jou vinger aan die lem raak die lem onmiddellik tot stilstand bring.
Jy sal miskien 'n snytjie aan jou vinger opdoen in die proses.
Die ander besoek was by Pieter van Niekerk, wat een van die stigterslede van die houtwerkgroep is. Sy werkwinkel is ook sy motorhuis en alles is op wiele sodat hy dit kan rondstoot en uit die pad stoot as hy sy motor intrek. Dit is egter 'n wye dubbelmotorhuis, want dit wat hy het sal nooit in 'n enkelgarage inpas nie.
Wat interessant is, is dat hierdie klompie houtwerkers enigiets kan doen. Hulle maak en restoureer pragtige meubels.
Hulle bou kaste en kiste, maar doen ook baie fyn werk.Van juwelekissies tot skaakborde en houtbakke en allerhande ander klein goedjies soos houtspeelgoed.
Sommiges maak selfs van hul gereedskap self uit hout uit.
Indien enigiemand meer te wete wil kom van die groep of belangstel om deel te word kan jy gerus vir Denis Fraser, huidige voorsitter, by 082 327 1616 skakel.