Bergfietsryers tot die uiterste beproef
STILBAAI - Die afgelope naweek se Stilbaaibergfietsrybyeenkoms het ryers van alle ouderdomme van heinde en verre gelok en hulle is tot die uiterste beproef.
Jan Heenop, organiseerder van die byeenkoms, het erken dat dit nie 'n maklike baan of roete is nie, maar hy wil die kinders van die Tuinroete voorberei sodat hulle nie uit hulle diepte is as hulle in die Paarl of Stellenbosch gaan deelneem nie. 'n Ryer uit Gauteng het beaam dat dit nie 'n maklike baan was nie en dat die bane waaraan hy gewoond is in Gauteng nie sulke styl rotsagtige roetes volg nie.
Saterdag is die marathon afgehandel met afstande wat gewissel het van 25 km tot 67 km op van die mooiste roetes wat net Stilbaai kan bied.
In die 25 km-wedren vir vroue het Shahnee George van Stilbaai in 'n tyd van 1:01:45 gewen. Die mans se 25 km-wedren is gewen deur Anda Nqumse in 'n tyd van 54:28 en die skoolseun van Stilbaai Willem Daniel Matthee het 11de in 'n skaflike tyd van 1:06:18 klaargemaak.
Die mans se 42 km-wedren is deur Dean Woolley in 'n tyd van 1:16:42 gewen.
Amone Buser het die 42 kmvrouewedren in 'n tyd van 1:46:56 gewen.
Die mans 67 km-wedren is gewen deur Divan Terblanche met 'n tyd van 2:08:08. In die derde plek was dit Kobus Barnard, 'n tandarts van Stilbaai.
Retha Mostert het die dames 67 km-wedren gewen met 'n tyd van 2:20:06.
Sondag is sirkelroetes, wat gewissel het van 2 200 m tot 4,5 km, aangepak en daar is rondtes van een tot selfs vyf keer afgelê.
Wenners van die Nipper-seuns en -dogters was Michael van Zyl Smit en Lila Olivier.
Die Sprog-seuns en -dogters se wenners was Migael van Zyl en Michelle Malan.
Die sub-junior wenners was Dawid van Zyl Smit en Ella Barnard.
Die jong mans- en dameswenners was Corban van Zyl Smit en Hannie Vreken.
Die junior mans en dameswenners was Lian Otto en Caitlyn-Lee Lotter.
Franci Joubert was die meesters se vrouewenner met 'n tyd van 1:05:31.
Die mans se meesterswenner was Nico Vreken met 'n tyd van 57:44.
Kobus Barnard was die veteraanmanswenner in 'n tyd van 1:11:07 en in die derde plek was nog 'n Stilbaaier Ruan Cronjê met sy tyd 1:20:44.
Die grootmeester se manswenner was Rudi de Wet met 'n tyd van 49:13.
Die heel klein kannetjies het met soveel passie en selfvertroue hulle wedrenne aangepak dat dit beslis 'n inspirasie was vir heelwat ouer deelnemers.