Die oopplan-kombuis
Grové het dié hangrak uit merantiplanke en spanningskabel geprakseer.
Die grootste verandering het in die kombuis gebeur. “Die vertrek was afgeskort in ’n tipiese sewentigerstyl waar Vroutjie se kosmakery buite Manlief en die gaste se oog moes gebeur,” vertel Fransa. “Dit was vir ons ’n probleem, want ons hou van kuier in die kombuis.”
Hul plan was eenvoudig: Die deuropening tussen die eetkamer en die kombuis is met ’n droëmuur toegebou, en die groot kas met sy dienluik, wat voorheen die oopplanvloei belemmer het, is versigtig verwyder sodat die kombuis met die res van die huis kon skakel. Grové het later die kas met ’n handsaag verklein sodat dit perfek teen ’n ander muur in die kombuis kon pas.
“Ek het nooit geweet Grové, wat apps vir slimfone en tablette ontwikkel, is só handig nie. Dit was regtig ’n aangename verrassing,” vertel Fransa trots.
Ná die bou- en skuifwerk is al die kasdeure afgehaal, skoongeskrop en met Plascon se Aqua Pura geverf. Nuwe deurknoppe het ook gevolg. Hulle het self begin om die ou muurteëls af te kap, maar later hulp gekry.
Al wat nuut gekoop is, is die grys werkblaaie van kwarts, die porseleinteëls in ’n skaakbordpatroon op die vloer, en swart en wit metro-teëls teen die mure. Grové het die laboratoriumwasbak, krane en induksiestoof geïnstalleer.
“Die werkery het by tye nogal gesellig geraak – veral wanneer vriende ywerig kom hand bysit het!”