Ougoed of hougoed?
Wonder jy of daardie erfstuk iets werd is? Stuur ’n foto en ons vind vir jou uit.
’n Bietjie tee?
Pragtige porselein
Karin Pereira da Silva van Namibië skryf My tante het vir my dié beeldjie gegee en dis steeds in ’n uitstekende toestand. Kan julle vir my meer daaroor vertel?
Shona Robie, direkteur by Stephan Welz & Co., antwoord Volgens die vervaardiger se waarmerk is dié beeldjie van ’n liefdespaartjie in die tweede helfte van die 20ste eeu deur Tengra in Spanje gemaak. Destyds was Lladró die voorste vervaardiger in die Spaanse porseleinbedryf; die firma is in die 1950’s deur die broers Juan, José en Vicente Lladró gestig. Later het ander maatskappye regoor Spanje verskyn, veral rondom die broers se tuisdorp, Valencia. Almal het die “Lladróstyl” nageboots in die hoop om munt te slaan uit die broers se sukses, maar min kon kers vashou by hul gehalte. Tengra-beeldjies is nie juis waardevol nie, en daar is baie op die internet te koop.
OUDERDOM Circa 20ste eeu WAARDE R200–300 Esmarie van Zyl van Nelspruit skryf Dié stelletjie van ses klein teekoppies en pierings – die vuurhoutjieboksie links wys die grootte – was ’n geskenk van my ouma. Dit dra die naam Meakin; het dit enige waarde?
Ainsley Taylor van Stephan Welz & Co. se keramiekafdeling antwoord James en George Meakin het in hul pa se voetspore gevolg toe hulle in die 1870’s J & G Meakin-keramiekwerke in Hanley, Staffordshire, gestig het. In 1874 het die derde seun, Alfred, sy eie maatskappy, Alfred Meakin Ltd, gestig. Die twee fabrieke het soortgelyke ware vervaardig en was bekend vir die groot getalle bekostigbare tafelgerei wat hulle vir die plaaslike én uitvoermark gemaak het. J & G Meakin is in die 1970’s aan ’n Amerikaanse firma verkoop. Jou koppies en pierings is tussen 1907 en 1914 vervaardig, en het net sentimentele waarde. OUDERDOM Circa 1907–1914 WAARDE Geen
Tyd is geld
Walter Vermaak van Rustenburg skryf My ma het dié silwersakhorlosie in 1940 by haar oom gekry nadat hy dit in ’n dobbelspel (destyds ’n baie gewilde tydverdryf) gewen het. Dis in ’n werkende toestand en die volgende is daarop gegraveer: “D”, “739”, “0.935” en drie leeus.
Jennifer Schultz van Stephan Welz & Co. se juweliersafdeling antwoord Dié pragtige oopgesig-sakhorlosie is waarskynlik deur ’n vrou gedra as ’n hangertjie of borsspeld. Die gegraveerde tekens is nie leeus nie, maar bere wat Switserse waarmerke is. ’n Enkele beer dui aan dat die metaal ’n 0,875silwerstandaard het, oftewel 87,5% fynsilwer bevat; drie Switserse bere dui aan dat die silwerstandaard 0,935 is. Dié tekens is aangebring op artikels wat na Brittanje uitgevoer sou word in reaksie op die Britse Handelsmerkwet van 1887 wat die tekens op ingevoerde artikels gereguleer het. Die gebruik van drie bere het sedert 1907 afgeneem nadat ’n nuwe waarmerkstelsel ingestel is vir uitvoergoedere na Brittanje. Albei tekens is amptelik gestaak in 1933.
Hierdie sakhorlosies is in groot getalle vervaardig en haal dus nie hoë bedrae op veilings nie. OUDERDOM Circa 1880’s–1930’s WAARDE Onder R1 000