Verdryf die vrees

Lindi Schaefer van Centurion skryf My een jaar oue mopshond is baie angstig en ontstel hom maklik oor dinge waaraan hy nie gewoond is nie – van donderstorms tot ’n naweek weg van die huis af. Ek wil nie graag medikasie gee nie; watter ander opsies het ek?

Die span van The Herbal Pet antwoord Troeteldiere kan vrees ervaar wanneer hulle iets ongewoons beleef. Dit kan aanleiding gee tot die veg-of-vlugreaksie, wat die dier kan laat weghardloop of aggressief maak. Die goeie nuus is dat jy iets aan die saak kan doen. Begin deur op te let na enige tekens dat jou hond of kat angstig is:

• blaf • bewe • probeer om by vensters uit te spring of om te ontsnap • vergrote pupille

• hy kruip weg • kou • hyg • loop heen en weer • grawe • kwyl • soek die eienaar

James Ha, ’n dieregedragkenner van die Universiteit van Washington, sê daar is drie maniere om dié toestand te hanteer: • Bestuur die probleem deur die dier vooraf gewoond te maak aan die bron van vrees. Jy kan byvoorbeeld CD’s met harde geluide speel, of jy kan jou hond of kat in ’n beheerde omgewing aan kinders blootstel; beloon telkens goeie gedrag. Jy kan jou dier ook wegneem van die “gevaar” af. Maak byvoorbeeld tydens vuurwerkvertonings of donderstorms vir jou troeteldier ’n bed in ’n veilige, toe vertrek; hou die deure en gordyne toe om die geraas uit te hou. Jy kan ook vir hom ’n Thundershirt of Pressure Wrap (te kry by aanlyn-troeteldierwinkels en takealot.com) aantrek; dit pas volgehoue druk op die borskas toe, wat help om spanning en angs te verlig. • Natuurlike middels soos Herbal Pet help troeteldiere om angs en spanning te hanteer. Dit neem ’n paar dae voor dit die gewenste uitwerking het – begin dus ’n week voor ’n spanningsvolle gebeurtenis om die middel by jou dier se kos te voeg. • As geen van bogenoemde werk nie, oorweeg dan tog medikasie. Praat vooraf met jou veearts daaroor sodat jy dit byderhand het wanneer jou troeteldier dit nodig kry.