Die proses
Met die hulp van Karin Cronjé van Hands On Creative Building and Management het die werk in alle erns begin.
Karin het die bestaande elektriese drade vir kragpunte en ligte na ’n geriefliker plek herlei sodat dit beter by die posisie van die bokkietafel kon pas.
Om die ruimte te isoleer is ’n dubbellaag Isotherm- termiese isolering tussen die bestaande vertikale latte van die Wendyhuis geplaas en vasgesit met horisontale houtlatte van 38 x 38 mm. Die latte dien ’n dubbele doel: Buiten dat dit die Isotherm in plek hou, bied dit ook ’n oppervlak waarop die 12 mm-gipsbord aan die binnekant geheg kan word. Die gipsbord, wat ook vir die plafon gebruik is, is met gipsmuurskroewe vasgesit.
Die 1,2 x 2,4 m-gipsborde het amper perfek in die Wendyhuis gepas en waar dit gesaag moes word, is afvalstukkies gebruik om kleiner areas, soos rondom die ligskakelaar, te bedek. Houtstroke, wat met paneelspykers in plek gehou is, is gebruik om enige onvolmaakthede te verbloem waar die borde gelas is, asook op ongelyke saaglyne.
Daarna is die vloer deeglik geskuur, met ’n grondlaag geverf en toe afgerond met Plascon Floor Paint in Charcoal. Buite is ’n Woodoc-buiteseëlaar gebruik wat subtiel by die tuin inskakel. REGS Dekstroke is met paneelspykers vasgekap oor lasplekke en waar onvolmaakthede verbloem moes word. Wenk Vir ’n Wendy-huis bied die 12 mm-gipsbord beter isolering as 6 mm- of 9 mm-bord.