Vlindervriendelik
’n Skoenlappertuin moet sonnig en windbeskut wees. So ’n tuin sal nooit perfek wees nie, maar blare wat deur ruspes gevreet word, is ’n klein prys om te betaal vir die vreugde om skoenlappers dop te hou.
’n Skoenlappertuin moet plante insluit vir elke stadium van ’n skoenlapper se lewensiklus – eier, ruspe, papie en skoenlapper – met blomme wat in verskillende seisoene blom om ’n groot verskeidenheid spesies te lok.
Plante met verskillende hoogtes sal groot én klein skoenlappers lok. Kies uit heuningblommetjies ( Alyssum), asters, Bauhinia galpinii, Buddleja, kattekruid, Hebe, hibiskusse, laventel, afrikaners, Nicotiana, Pentas, Plumbago, Scabiosa, tiemie, Tulbaghia en ysterkruid ( Verbena).
Skoenlappers is mal oor madeliefies, en daar is ’n groot verskeidenheid een- en meerjariges in wit, room, pienk, appelkoos, geel, rooi en mahonie wat in hoogte wissel; dit sluit gloriosa-madeliefies, Echinacea, shasta-madeliefies, Matricaria, margrietjies, Felicia en botterblomme ( Gazania) in.
Benewens die regte plante vir ruspes en nektar vir skoenlappers, sorg ook vir genoeg water. Modderpoele en verweerde klippe wat water opvang, is plekke waar skoenlappers graag drink, in die son sit en hul vlerkspiere opwarm voor hulle vlieg. • Weedbuster-week (die tweede week in Oktober) is net die tyd om die indringerplante in jou tuin te verwyder, waaronder Vinca minor en Vinca major (steriele kultivars en hibriede is nie ’n probleem nie), Duchesnea indica en Tradescantia met hul groen-enpers loof. • Maak nuutgeplante bome en struike een keer per week goed nat om die ontwikkeling van ’n sterk wortelstelsel en nuwe groei aan te moedig. Voedingswortels loop so wyd soos die takke se druplyn; maak dus seker dié area kry genoeg water en misstof. • Bemes gevestigde struike met ’n algemene misstof soos 2:3:2 en strooi ’n 8 cm-deklaag wat sal keer dat onkruid opkom en boonop vog in die grond sal hou. Maak die grond nat voordat jy die deklaag strooi. • ’n Paar jaarplante wat maklik groei en ’n helder skouspel van kleur regdeur die somer bied, is spinnekopblomme ( Cleome), kosmosse, beddingdahlias, afrikaners, Nicotiana, Vincakultivars en jakobregops ( Zinnia). Al dié plante moet op ’n sonnige plek geplant word. • Skuif huisplante weg van vensters af namate dit warmer word. • Stel jou grassnyer se lemme hoër in warm, droë weer om te voorkom dat die wortels ontbloot word en skroei. Maak ook jou grasperk gereelder nat. >>