Ouma Jonni se “glamour”-koek
My ouma Jonni van Villiersdorp was bekend vir hierdie resep. Amper elke familielid het ’n ander herinnering van hoe dit moet lyk en proe, maar die wolkerige versiersel en glanskersies is wat dit ’n treffer maak.
Genoeg vir 1 koek Bereidingstyd: 35 minute Baktyd: sowat 40 minute Oondtemperatuur: 180 °C
• 125 g (125 ml) botter • 210 g (250 ml) suiker • 2 eiers • 245 g (440 ml) koekmeel, gesif • 45 ml jelliepoeier (ek gebruik aarbei) • knippie sout • 180 ml melk • 12,5 ml bakpoeier VERSIERSEL • orige jelliepoeier (sowat 20 ml) • 2 klein eierwitte • 210 g (250 ml) strooisuiker • knippie kremetart • 60 ml water • knippie sout
1 Voer ’n 18 cm-koekpannetjie met bakpapier uit en smeer goed met botter. Voorverhit die oond. Verroom die botter en suiker, en voeg die eiers een vir een by; klits goed ná elke byvoeging. Sif die meel, jellie en sout saam en voeg dit by die bottermengsel, gevolg deur die melk. Meng deur en vou laaste die bakpoeier met ’n paar vinnige hale in die mengsel in. Skep die beslag in die voorbereide pan en bak dit vir sowat 40 minute of totdat ’n toetspen skoon uitkom. Laat dit heeltemal afkoel.
Sit al die bestanddele in ’n glasmengbak oor ’n kastrol kookwater op die stoof en klits dit met ’n elektriese klitser vir sowat 7 minute. Die versiersel moet dik en glansend wees. Verwyder die bak van die hitte en klits totdat die versiersel effens afgekoel het (as die versiersel in die warm mengbak staan, kan dit skif).
Sny die afgekoelde koek in die helfte en smeer ’n dik laag versiersel tussenin, bo-op en rondom. Rond dit af met glanskersies, en as jy dekadent wil wees, meringue-rose vir die mooi.
Roosgegeurde roomhorinkies
Indrukwekkend, en so lekker!
Genoeg vir sowat 12 horinkies Bereidingstyd: 45 minute, plus rustyd Gaarmaaktyd: 25 minute
• 90 g (90 ml) botter • 250 g (450 ml) meel, gesif • 150 ml soet witwyn (ons het gewürstraminer gebruik) • 1 eierwit vir aanverf • olie vir diepbraai • 250 ml room • 15–30 ml strooisuiker • 30 ml roosstroop, of na smaak • 100 g witsjokolade, gesmelt • 50 g pistasieneute, gekap • granaatpitte vir versiering
1 Vryf die botter in die meel totdat dit soos growwe broodkrummels lyk. Voeg die wyn by en meng tot ’n stywe deeg. Verdeel die deeg in twee, maak plat skywe met jou hande en draai dit in kleefplastiek toe; laat dit oornag in die yskas rus. (Dis noodsaaklik om die deeg te laat rus sodat dit lekker dun kan uitrol.) 2 Haal die deeg uit die yskas en laat dit kamertemperatuur bereik. Rol dit dun uit (sowat 2 mm dik). Wenk ’n Pastamasjien is ideaal hiervoor, maar ’n gewone koekroller werk net so goed. 3 Sny die deeg in stroke van sowat 2 cm breed en 35 cm lank. Verf met eierwit. Draai nou die deegstroke met die geverfde kant na buite om roomhorinkievorms (ek het myne by The Crazy Store gekoop). Begin by die punt; die stroke moet effens oorvleuel. 4 Verhit die olie en diepbraai die horinkies in sarsies tot goudbruin (sowat 2–3 minute per sarsie, afhangend hoe warm die olie is. Dreineer die horinkies op kombuispapier op ’n draadrakkie. Verwyder die vorms en laat die horinkies heeltemal afkoel. 5 Klits die room en strooisuiker totdat stywe punte vorm en geur na smaak met roosstroop. Smelt die witsjokolade en doop die bokante van die horinkies daarin en rol dit dan in die gekapte neute. Vul die horinkies met die roommengsel en sprinkel granaatpitte oor. Moenie te lank wag voordat jy weglê nie, want die room sal die horinkies sag maak.