Persoonlike smaak

Debbie se geliefde Franse vintage-leerstoel het ’n ereplek in die sitkamer.

Die huis weerspieël ongetwyfeld Debbie se persoonlikheid. Haar styl is eenvoudig en privaat, met ’n voorliefde vir mooigoed. “My twee gunsteling-skakerings is die donkergroen tekstuurryke verf teen die mure van ons slaap- en eetkamer en gesinsvertrek, en die dieprooi van ons kombuiskaste en voordeur,” sê Debbie. “Ek is mal oor hoe die kombinasie van erfstukke en oudhede, soos die olieverfskilderye van my man se voorsate, my geliefde Franse leerstoel en die horlosies wat ek versamel, tot hul reg kom teen die donker muurkleur.”

Dié kas (regs) in die gesinsvertrek het al verskeie doele gedien, onder

meer klerekas en drankkabinet, en al ’n hele paar keer onder die verfkwaste deurgeloop. Nou word

breekware daarin gebêre. Olieverfskilderye van Steve se voorouers (bo) vertoon mooi teen die “Wren”-muurkleur wat Salomé Gunter spesiaal laat meng het. (Earthcote het ’n soortgelyke palet.) Debbie het nog altyd gedroom van ’n gesinsvertrek in ’n skuurstyl ( regs). Hulle het 15 jaar gelede dié vertrek met sy oop dakbalke en houtvloer aangebou. Die vloer hier was die inspirasie vir die vloere in die res van die huis toe latere opknapwerk gedoen is. Voor die klein vierkantvenster bo die boekrak hang geen gordyn nie. “Dis vir ons tog te lekker om te kyk hoe die glasogies en janfrederiks by ons voëlvoerders baljaar,” sê Debbie.