Blomme by dosyne
Van middel Oktober tot middel November blom die lelies op hul mooiste. Dis dan dat almal op Uitkyk bymekaarkom. “Ek het altyd arms vol van die lelies gepluk, maar dit was onmoontlik om by almal uit te kom en dit weg te gee. ’n Mens kan mos ook net soveel lelies in jou motor laai. Dit is toe dat my man, Wouter, voorgestel het ons nooi liewer almal hierheen om self te kom pluk. En watter goeie idee was dit nie!”
Van toe af vier die Mullers elke jaar fees wanneer die Sint Josefslelies blom. “Die dag voor die tyd bak en brou ek tot diep in die nag en die volgende dag kuier ons, eet ons en pluk ons blomme. Dis ’n bederfgeleentheid, ’n tyd om vriendskappe te vier en ’n tyd om uit te deel.”
Soveel verskeidenheid
Illze se Sint Josefslelies groei in haar snyblomtuin, wat sy haar “potager” noem. “Ek wil nou nie fênsie probeer klink nie, maar dis regtig wat dit is. Dis ’n tuin met kruie, groente, vrugte, bessies en blomme vir die hele huis en kombuis. Die ou hoenderhok was eers hier en ek het altyd gedink ek wil ’n hek in die ou ringmuur sit en ’n kruietuin hier maak. So ’n geheime tuin het nog altyd vir my ’n sekere bekoring ingehou,” verduidelik sy.
Illze het haar snyblomtuin ’n effens Middeleeuse aanslag gegee met vier verhewe beddings met gevlegte heinings. Hierin het daar laas jaar kappertjies gegroei, en vanjaar wit malvas. Die ander heinings en stellasies het ook Middeleeuse patrone en word gebruik om groente soos ertjies, tamaties en boontjies, selfs appelliefies, teen op te lei. Hulle maak al die stellasies self, meestal van riet en swartwattel wat op die plaas groei.
“In my snyblomtuin kweek ek groente en kruie wat ek regtig gebruik, soos mosterdslaai, tamaties, basiliekruid, pietersielie, roosmaryn, tiemie, lourier, radyse, boontjies, spinasie, aarbeie en nog vele meer. En ek plant blomme wat ek kan pluk: sonneblomme, varkore, ridderspore, Salvia leucantha, aardartisjokke en natuurlik die Sint Josefslelies. Dan is daar ’n paar vyebome (my gunsteling-vrug), ’n moerbeiboom en ’n perskeboom wat die middelpunt van die snyblomtuin uitmaak. Die perskeboom hou ek eintlik vir sy bloeisels aan – ek is mal daaroor om dit in die lente te pluk.” >>