Bemes jou rose so:

Tydens die groeiseisoen gebruik rose baie voedingstowwe om te blom en nuwe lote te vorm. Deur jou rose van September tot April (of Maart vir tuine in kouer areas) een keer per maand te bemes, word die noodsaaklike voedingstowwe gereeld aangevul en die eindresultaat is opvallend. Dis maklik om “ondervoede” roosbome uit te ken: Die blare is liggroen, en die bome groei en blom nie goed nie en kry maklik swartvlek, selfs al behandel jy jou rose daarteen.

Dis nie ingewikkeld om rose te bemes nie, maar daar is ’n paar basiese riglyne: • Gebruik ’n aanbevole roosmisstof soos Vigorosa (5:1:5) wat die regte kombinasie stikstof, fosfor, kalium, Engelse sout, kalk en mikro-elemente vir blom-, wortel- en lootontwikkeling bevat. • Hou by die aanbevole dosis; die vervaardiger werk uit presies hoeveel ’n roosboom nodig het. As jy ’n roosboom dubbel die hoeveelheid misstof gee, gaan die boom nie vinniger groei nie; die misstof gaan waarskynlik eerder die blare brand en selfs die boom laat vrek. • Moenie klein hopies misstof rondom die basis van ’n roosboom, veral hoogstamrose, gooi nie. Dis te gekonsentreerd en kan die blare brand. • Die beste manier om misstof toe te dien, is om dit oor of rondom ’n roosboom te strooi sodat dit op die deklaag val. Skud of spuit al die misstof af wat op die blare agtergebly het. • Maak die roosboom goed nat ná bemesting sodat die misstof die wortels kan bereik. • Swart stamme en bros, swartbruin blare is ’n teken van oorbemesting.

Oorbemesting Bruin blare