Ravioli
Genoeg vir 4 ruim porsies Bereidingstyd hang af van jou vernuf Gaarmaaktyd: 15 minute
PASTADEEG • 200 g (360 ml) koekmeel, plus ekstra vir uitrol • 2 eiers by kamertemperatuur • 1 eiergeel RICOTTA-EN-SPEKVULSEL • 250 g spekvleis, fyngekap • 5 ml vars vinkelblaartjies • 125 g ricottakaas • 30 ml dubbeldik room • 1 eiergeel • 45 ml parmesaankaas • 3 ml gerasperde suurlemoenskil • knippie neutmuskaat GARNAALSOUS • 15 ml olyfolie • 12 steurgarnale, afgedop (behou die koppe) • 1 klein ui, gekap • 1 knoffelhuisie, gekap • 30 ml tamatiepuree • 250 g botter • 2 tamaties, geskil, ontpit en in klein blokkies gesny • 45 ml verjuice • vars basilieblaartjies • 60 ml dennepitte, opsioneel
Sit die meel in ’n groot mengbak, maak ’n holte in die middel en breek die eiers en eiergeel daarin. Klits die eiers met ’n vurk in die holte en trek die meel bietjie vir bietjie daarby in; bewerk dit dan met jou hande totdat die meel ’n deeg vorm. Keer dit uit en knie tot glad en elasties. Voeg ekstra meel by soos nodig. Verdeel die deeg in drie, vorm plat skywe en draai dit in kleefplastiek toe. Laat rus vir 1 uur by kamertemperatuur.
Braai die spek tot bros. Laat dit heeltemal afkoel en meng met die res van die vulselbestanddele. Geur met sout en peper.
As jy ’n pastamasjien het, sprinkel ’n bietjie meel op jou werkoppervlak en op die masjien se rollers. Stel die masjien op sy dikste (dit is óf die hoogste óf die laagste syfer, afhangend van die handelsmerk) en voer een stuk deeg deur. Vou dit toe en herhaal nog twee keer op dieselfde verstelling tot lekker glad. Herhaal nou die proses met die ander twee stukke deeg. Van hier af moet jy met elke volgende rol die masjien dunner stel – voer al drie stukke deeg deur elke verstelling tot by die tweede laaste verstelling. 4 Sny elke deegvel in die lengte middeldeur. Plaas ’n vel op jou werkoppervlak en skep teelepels vulsel eweredig sowat 2 cm uitmekaar daarop. Smeer geklitste eier met ’n kwassie om die vulsel, sit ’n tweede vel bo-op en druk die deeg stewig vas oor die vulsel (pasop vir lugblasies). Sny die deeg met ’n skerp mes in vierkante om die ravioli’s te vorm en pak dit op ’n meelbestrooide skinkbord.
Verhit die olie en braai die steurgarnaalkoppe tot pienk en droog. Voeg die ui, knoffel en tamatiepuree by en braai saam vir 5 minute. Smelt die botter by en braai vir nog 5 minute. Giet die mengsel deur ’n sif. Braai nou die steurgarnale vinnig oor hoë hitte tot pienk. Roer die tamatieblokkies, verjuice en steurgarnaalbotter by. Verhit tot deurwarm en hou eenkant.
Bring ’n groot pot water tot kookpunt. Kook ’n paar ravioli’s op ’n slag vir 3–5 minute of tot net gaar. Skep dit versigtig met ’n gaatjieslepel uit in die garnaalsous. Herhaal totdat almal gekook is en sit voor met ’n sprinkel basilieblaartjies en dennepitte. >>