Vars idees met ’n skoot helder kleur
’n Spatsel helder kleur is ’n heerlike energie-inspuiting vir jou leefruimte.
1 Noot vir noot
Dié kleurvolle hoek in Ryno en Marita Palm se eetkamer is deur die bougainvilleas van hul Kaapse buurt, Observatory, geïnspireer. Marita se pa het ’n duikklop-onderneming en het die ou klavier professioneel gespuitverf. “Ons kinders het van kleins af alles by hom laat verf in ruil vir ’n koeldrank en ’n burger,” sê sy. Die warm pienk (Dulux 32RR 26/413) kontrasteer mooi met die koel turkoois (Dulux 30BG/207) muur. Terloops, hou dié idee maar liewer vir daai ou honkietonk; nie vir ’n kosbare erfstuk nie.
2 Hallo, sonskyn
’n Goudgeel voordeur sê dadelik welkom en lyk prettig, sê die interieur-ontwerper Claudia Fabian van Mer Design, wat die Plascon-kleur Sunkissed (Y3-A1-2) vir die voordeur van Ilana en André Joubert se West Beach-huis gekies het. “Ilana wou ’n speelse, informele leefruimte hê en ek het spatsels geel gebruik wat jou heelpad van die voordeur na die agterstoep lei,” verduidelik Claudia. Spuitverfwerk deur Bellacraft; dekor en ontwerp deur Mer Design
3 Slim kopstuk
’n Gehawende kopstuk lyk weer splinternuut danksy plakpapier. Die kreatiewe huiseienaar het ’n blou origami-voëlmotief gekies om by haar seewoonstel te pas – én omdat sy dol is oor alles wat Japannees is. Die plakpapier begin op die muur links van die bed, wat die kopstuk groter laat lyk. Die spatsels geel van die kanttafel en taxi-lamp – tweedehandse vondste – skep ’n bietjie warmte by die koel blou-en-wit palet. Origami-plakpapier spesiaal gedruk deur ArtLab; deken van Weylandts; bedlamp van Woolworths; houtmotor van Present Space; haas-muurlamp deur Brett Murray van African Image