Vra die kenners
Soek jy skadu vir jou stoep, wil jy eksperimenteer met inlegwerk of ’n verftegniek? Vra net – ons kry die antwoorde.
In die skadu
Rosemary Mason van Scottburgh skryf Ek is mal oor die bedekte stoep op bladsy 33 en die een op bladsy 117 van Tuis
Werf 2015. Ons stoep is bedek met ’n vinnig groeiende Thunbergia-klimplant, maar noudat ek nie meer hulp in die tuin het nie, wil ek dit vervang met latte of iets soortgelyks en dit bedek met deursigtige dakplate. Ek woon by die kus, so ek is ook bekommerd oor die hitte; die stoep is oop en kry smiddae volson. Watter soort skadulap kan ek vir koelte gebruik? Tessa van Wyngaarden van Coolaroo antwoord As jy ’n soliede bedekking soek, is stoepblindings ideaal om hitte uit te hou. Daar is baie verskillende style om van te kies en pryse wissel tussen R675 en R2 499 per klaargemaakte blinding, afhangend van die grootte.
As jy op soliede perspeksplate besluit, kan jy dit maklik bedek met ons skadulap wat 90% van die son se UV-strale uithou. Die skadulap is beskikbaar in vier kleure; kies ’n ligte kleur om jou stoep koeler te hou. Die materiaal is duursaam en bestand teen verwering weens UV-strale.
Ons Extreme Shade Sail is ’n wonderlike oplossing vir skadu oor ’n stoep, en dit vra min onderhoud. Nie net is dit uiters kostedoeltreffend nie, dis ook ’n praktiese oplossing vir die kus. Dis gemaak van ’n duursame, gebreide materiaal, hou meer as 90% van die son se UV-strale uit, maar laat steeds lug deur, wat jou koel hou. Die lap is mufbestand en kan met ’n tuinslang skoongespuit word. Die seil is ook só ontwerp dat dit kusgebiede se sterk wind kan hanteer.
Oorweeg dit om twee of meer skaduseile te laat oorvleuel om jou eie persoonlike styl te weerspieël en, natuurlik, meer skadu te skep. Dit kom in ’n verskeidenheid vorms en groottes en pryse wissel van R1 199 tot R3 299 per klaargemaakte seil.
KONTAK 021 701 0787, coolaroo.co.za