Rede vir opknap
Nadat hulle jare lank op hul pragtige, afgesonderde gasteplaas in die Sederberge gewoon het, het Andrea en haar oorlede man, Moritz, na die sjarmante dorpie Stanford in die Overberg getrek. Hulle het die huis in Januarie 2013 gekoop – die onweerstaanbare knus atmosfeer het die besluit maklik gemaak.
“Ons het baie gou nuwe vriende gemaak, maar vinnig besef daar was nie plek om hulle te onthaal nie,” onthou Andrea, wat besluit het sy moes die stoep van 27 m2 oor die lengte van die huis langs verleng om ekstra leefruimte te skep.
Andrea het met plaaslike bouers en nutsmanne gewerk om haar visie ’n werklikheid te maak; sy kon ook die kennis en ervaring wat sy opgedoen het toe sy gastekothuise op hul plaas gebou het, inspan. “Ek was nog altyd lief vir die buitelewe. En ek vermoed omdat ek van Duitsland is, waardeer ek dit nog meer! Ons tuintjie is pragtig en privaat, so ek wou regtig ’n ruimte skep wat ons goed kon benut,” sê Andrea. Sy het besluit om die stoep te bedek sodat die meubels heeljaar buite kan staan; sy het ook al die slaapkamerdeure só ontwerp dat hulle op dié ruimte oopmaak.
“Dis net wonderlik om hier te onthaal. Volwassenes en kinders vind altyd ’n plekkie om te kuier of rustig te lees,” sê Andrea. Sy het verskillende “vertrekke” in die oopplanruimte geskep; haar gunsteling is die deel met die dagbeddens. “Ek is dol daaroor om hier te kom sit met ’n boek en te sien hoe die kinders in die swembad baljaar. Dis ook hier waar ek vir hulle slaaptydstories onder die feeliggies lees.”