Skep tekstuur met inlegsels
Leighan van Schalkwyk van Fraserburg skryf Ek hou van die sementvloer met hout-inlegsels op bladsy 100 van Tuis Verf Dit. Ons wil dieselfde doen in ons plaashuis; enige raad?
Joanne Sykes van Cemcrete antwoord Daar is verskeie maniere om dié voorkoms te kry wanneer jy houtinlegsels in afgevlakte vloere installeer; hier is twee opsies: 1 Met ’n nuwe gebou, gebruik Cemcrete se SuperScreed en Colour Hardener (’n dekoratiewe poeier met ’n pigment wat ingepleister word). Sodra die vloerblad gereed is vir die SuperScreed en Colour Hardener (wat jy gelyktydig aanwend), kan jy die hout-inlegsels eers in plastiek toedraai om dit te beskerm voor jy dit lê. Wend dan die SuperScreed en Colour Hardener aan tot gelyk met die hout; volg die aanwysings. Cemcrete se SuperScreed kan in diktes van 8 mm tot 20 mm aangewend word (gewone afvlaklae moet minstens 20 mm dik wees). Sodra dit klaar verhard het, kan jy enige sigbare plastiek verwyder. 2 ’n Opsie wat beter geskik is vir opknapprojekte is dekoratiewe bolae soos Cemcrete se CreteCote of FloorCrete (’n selfnivellerende produk – hy gaan lê self gelyk), maar wees gewaarsku, dis ’n stowwerige storie omdat jy met ’n hoekslyper en ’n diamantlem gleuwe vir die hout in die bestaande afvlaklaag of vloer moet sny. Bedek die hout met plastiek om dit te beskerm terwyl jy die CreteCote of FloorCrete aanwend. Wend die dekoratiewe laag aan volgens die aanwysings. Sodra dit heeltemal verhard het, kan jy die plastiek op die hout verwyder en die hele vloer verseël met een van Cemcrete se verseëlaars.
KONTAK 011 474 2415, cemcrete.co.za >>