Tawwe tienies vir ’n kustuin
Son, wind, seesproei en min water? Geen probleem vir dié 3 geharde plante nie.
(Limonium perezii)
Die reusepapierblom is enige kustuinier se droom. Dié meerjarige is windbestand, op sy gelukkigste naby die see en boonop ’n goeie snyblom wat lank in water hou. Wanneer die reusepapierblom van Junie regdeur die winter tot in die somer blom, is dit op sy mooiste. Plant dit in volson by die see of gedeeltelike skaduwee in die binneland waar dit baie warm is. Die plant hou van goed gedreineerde, selfs sanderige, grond en kan veral by die kus met min water klaarkom. Hoewel die plant droogtebestand is, wil dit in die binneland meer water hê. Sny dooie blomme gereeld af om dit aan te moedig om nog meer te blom. Plant ook Limonium latifolium of die inheemse L. perigrinum – laasgenoemde, ’n baie geharde plant, se pienk blomme verskyn in die somer. Dié twee alternatiewe is ook geskik vir seetuine. >>
(Westringia fruticosa)
Dié Australiese struik het sy Engelse noemnaam, “coastal rosemary”, nie sonder rede gekry nie. Dis ’n baie nuttige plant in kustuine, want dit word nie in die minste gepla deur ’n souterige seesproei nie. Van die lente dwarsdeur die somer dra dit klein wit, pienk, ligpers of ligblou blommetjies aan die punte van groen-grys takkies. Australiese roosmaryn verkies reën in die winter, maar aard goed in somerreënstreke solank dit in die winter water kry. Plant dié struik in volson of selfs gedeeltelike skaduwee in redelik vrugbare grond.
(Rosmarinus officinalis)
Al is roosmaryn meer bekend as ’n krui, is dit ook ’n baie nuttige beddingplant. En wat maak dit nou saak as jou kombuiskruie tussen jou blomme groei? Dié meerjarige struik, wat ook in ’n heining gesnoei kan word, is gehard en vra min water. Dit aard goed in kustuine en in droër dele van die land. Gee roosmaryn aanvanklik gereeld water tot die plant goed gevestig is of wanneer dit vir ’n tyd lank baie droog was. Roosmaryn, met sy geurige blare, blom vir lang tye aaneen. Dis ’n maklike plant om te kweek; dit hou van baie son en sal goed aard in enige tipe grond, mits dit goed dreineer.