Hoenderslaai met vars klapperskaafsels
Vars klapper gee dié slaai ’n eksotiese kinkel. As jy sukkel om dit te kry, rol die dye in gedroogde klapper voor jy braai. Genoeg vir 6 porsies Bereidingstyd: 30 minute, plus marineertyd oornag Gaarmaaktyd: 30 minute
• 700g hoenderdyfilette, in 3cm-blokke gesny
• 90g gemengde babaslaaiblare en kruie soos koljander, basilie en gekapte sprietuie
• 2 klein kopkole, fyngesny
• 1 wortel, in julienne-repies gesny of grofgerasper
• 4 murgpampoentjies, in julienne-repies gesny of grofgerasper
• 12 peulertjies, gehalveer
• 125ml gerasperde vars klapper
•suurlemoenwiggies MARINADE
• 1 ui, grofgekap
• 1 groen soetrissie, ontpit en grofgekap
• 3 knoffelhuisies
• 1 brandrissie, ontpit
• 1 duim gemmer, geskil
• 30ml suurlemoensap
• 30ml oestersous
• 30ml vissous
• 100ml sojasous
1 Marineer die hoender Maak al die marinade bestanddele saam fyn met ’n staafmenger en giet dit oor die hoender in ’n glasbak. Bedek en sit dit oornag in die yskas. 2 Dreineer die gemarineerde hoender en druk droog (dis nie nodig om al die marinade te verwyder nie). Vlakbraai die hoender in olyfolie – of nog beter, braai dit in ’n ketelbraai vir ’n rokerige geur. Laat rus vir sowat 10 minute.
3 Stel die slaai saam Meng al die slaaibestanddele saam, pak die gaar hoender daarop en sit dit voor met suurlemoenwiggies en ’n romerige slaaisous.