Tortillas met gerafelde lamsvleis

Harissa, ’n brandrissiepasta uit Noord-Afrika, is die geheime bestanddeel in dié smelt-in-die-mond lam.

Genoeg vir sowat 12 tortillas

• Bereidingstyd: 40 minute

• Gaarmaaktyd: 3 uur

• Oondtemperatuur: 170°C

• 600g lamsblad-roosterstuk

• 30ml olie

• 30ml worcestersous

• 30ml harissa

• 1 blik gekapte tamaties

• 2 lourierblare

• 1 blik keker-ertjies, gespoel en gedreineer

• 2 eiervrugte, in 5mm dik ringe gesny

• sowat 60ml olyfolie (opsioneel)

• 12 klein tortillas of platbrode (sien bladsy 114)

• 125ml gekapte platblaarpietersielie

• 125ml pistasieneute, gekap 1 Braai die vleis in die olie tot alkante bruin. Sit dit in ’n oondbak met ’n styfpassende deksel en voeg die worcestersous, harissa, tamaties en lourierblare by. Geur met sout en peper, bedek en rooster vir 2 uur in ’n voorverhitte oond teen 170 °C. Haal die lam uit die oond en laat staan vir nog 40 minute. Die vleis moet maklik met twee vurke uitmekaargetrek kan word, dan is dit reg. Meng die rafelvleis terug in die sous en voeg die keker-ertjies by. 2 Verhit ’n riffelpan en braai die eiervrugringe tot gaar. Sprinkel die gaar eiervrugskywe met die olyfolie en geur met sout en peper.

3 Om saam te stel Braai die tortillas alkante in ’n droë pan om dit sag te maak en verdeel die lam, eiervrug, pietersielie en neute dan tussen die porsies. Sit dadelik voor. Hoemoes en tzatziki is ’n opsionele ekstra. >>