Varklenderol met krummelkors
Die twee takke van Frank’s Meat, die familiesaak, wedywer gereeld oor wie die lekkerste vleisresepte kan ontwikkel. Dié dis is een van hul wenresepte. • 3,2kg-varklendestuk, vel verwyder en gevlek • ruim strooisel Himalaja-seesout • knippie braaispeserye en gemengde kruie • 70g soet korrelmosterd • 250g droëperskes, oornag in rooibostee geweek en gedreineer • 250g ontpitte pruimedante • 120g fetakaas, gekrummel KRUMMELLAAG • 125ml bruinbroodkrummels • 1 takkie roosmaryn, grofgekap • 30ml roket, fyngekap • gerasperde skil van 1 suurlemoen • sowat 30ml olyfolie • 125ml pekanneute, fyngekap
1 Vryf die lendestuk goed in met die sout, braaispeserye en kruie. (Frank vertel hulle “tuimel” hul vleis in ’n masjien by die slaghuis vir sowat 45 minute saam met hul geheime mengsel speserye en kruie totdat al die geure geabsorbeer is.) Smeer nou die mosterd oor en pak dan die perskes, pruimedante en feta oor die vleis. Rol die lendestuk styf op en bind vas met kombuistou. As jy wil, vou dit nou ook toe met ’n net om te keer dat die vulsel uitpeul en die rol sy vorm verloor. 2 Plaas die vleisrol in ’n diep kasserol met ’n bietjie olie en bedek met ’n digsluitende deksel. Bak vir 3 uur in ’n voorverhitte oond teen 180 °C. Gerda se wenk As jy onseker is oor die gaarmaaktyd, bak die vleis vir 1 uur per kilogram. 3 Laat die vleisstuk afkoel tot hanteerbaar en haal die net af, maar los eers die kombuistou aan. Plaas die vleisrol op ’n bakplaat. Meng al die krummelbestanddele saam en pak dit bo-op die vleis om ’n kors te vorm. Sit dit terug in die warm oond vir sowat 15 minute of tot goudbruin. Verwyder die tou en sit voor met ingelegde kwepers.