Sjokoladekoekstapels
2 Maak die sjokoladerokkies 3 Om voor te sit 59
Corné se sjokoladekoekresep vir dié stapel kom uit Bak met gemak – 101 resepte deur Hilary Biller, Jenny Kay en Elinor Storkey (Struik Uitgewers). Genoeg vir 24 koekies Bereidingstyd: hang af van jou vernuf Baktyd: 12 minute
• 60ml kakao • 90ml warm water • 5ml vanieljegeursel • 250ml koekmeel • 125ml strooisuiker • 10ml bakpoeier • sout • 60ml olie • 4 ekstragroot eiers, geskei • ekstra 80ml strooisuiker • donker baksjokolade, sowat 20g per koekie • 50g donkersjokolade, gesmelt en met ’n bietjie melk verdun • bessies • meringueskuimpies • sjokoladesous
Voorverhit die oond tot 180 °C. Meng die kakao en warm water en laat afkoel. Voeg die vanielje by. Sif die meel, strooisuiker, bakpoeier en sout saam. Maak ’n holte in die middel van die droë bestanddele en voeg die olie, eiergele en kakaomengsel by. Meng saam. Klits die eierwitte in ’n aparte bak tot stywe punte vorm en voeg die laaste 80 ml strooisuiker lepel vir lepel by tot ingemeng. Vou dit versigtig by die sjokolademengsel in. Skep nou die beslag sowat 1 cm diep in die holtes van kolwyntjiepannetjies (moenie smeer nie) en bak vir 12 minute. Skep ’n lepel verdunde gesmelte donkersjokolade oor elke koekie – dit hou die koek klam. Keer versigtig uit op ’n draadrak en laat heeltemal afkoel.
Knip stroke bakpapier sowat 5 cm breed en 2 cm langer as die omtrek van die koekvormpies. Smelt die baksjokolade en skep dit in ’n spuitsak. Spuit ’n kartelpatroon op elke papierstrook en laat staan vir sowat 10 minute tot amper gestol. Vou die papier met die sjokolade om elke koekie en bring die punte bymekaar. Laat hard word en verwyder versigtig die bakpapier.
Versier met bessies en meringueskuimpies. Bind ’n lintjie om elke stapeltjie en sit voor met roomys en ekstra sjokoladesous. >>