Take vir Desember
110
Feestelike kleur
As jy hou van tradisionele rooi vir die feestyd, is rooi beddingbegonias ’n goeie keuse vir areas met gedeeltelike skadu, so ook fuchsias met hul rooi en wit klokvormige blomme. Versier jou patio met rooi Mandevilla en potte vol rooi miniatuurrose, Barbertonse madeliefies en anthuriums.
Verhelder dele rondom die swembad, kuierplek en stoep met ’n kombinasie van kleurryke potte vol blommende jaarplante (maagdeblomme, afrikaners, Nicotiana, jakobregops, ysterkruid) en meerjariges (Alstroemeria, agapante, malvas) wat nou in tuinsentrums beskikbaar is.
Kleursakke (plante in volle blom by die kwekery) werk goed saam met gevestigde plante in ’n randakker. Nog ’n voordeel van kleursakke tussen permanente aanplantings is dat jy dadelik kan visualiseer hoe jy in die toekoms wil plant en mooi kan sien of die kleur en vorm van die plante by hul metgeselle pas. Bestee minder tyd aan tuinwerk: Gooi deklae om water te bespaar, vul kaal kolle met jaarplante in potte en groepeer plante met soortgelyke water- en skadubehoeftes saam. Wêreldgronddag op 5 Desember plaas die fokus op goeie grond in jou tuin – grond ryk aan organiese materiaal, natuurlike minerale, mikrobiese aktiwiteit en erdwurms. Is joune reg?
Skadu vir die somer
As jou tuin in die somer baie son kry (en jy genoeg plek het), oorweeg ’n gazebo. Jy kan dit enige plek met ’n mooi uitsig staanmaak.
Gazebo-style wissel van stewige dekrietstrukture tot gietysterskeppings met delikate broekieskant, en jy kan dit as fokuspunt en kuierplek in die tuin gebruik, of in ’n beskutte hoekie sit waar jy in afsondering kan lees, skets en stiltetyd hou. Gewilde vorms is rond, vierkantig, ses- of agthoekig – die keuse is joune.
Nog ’n opsie is ’n prieel. Dit bied beskerming teen die somerson en verskaf ’n kalmerende skadukol waar die besige tuinier kan rus. Gegeurde rankplante soos Chinese jasmyn (Jasminum polyanthum), perskransie (Petrea volubilis) en bloureën (Wisteria sinensis) is almal goeie rankers vir ’n prieel.