Doendinge dié maand
’n Skemertuin
In warm weer is die tuin ’n heerlike plek om te ontspan nadat die hitte van die dag ’n bietjie bedaar het. ’n Skemertuin hoef nie groot te wees nie. Dit kan deel vorm van die hooftuin of naby ’n patio of swembad wees met goed beligte paadjies gebou met ligte plaveistene.
Wanneer die son sak, sal wit agapante, heuningblommetjies, varkore, Galtonia, krismisrose, Hydrangea quercifolia met sy leeragtige blare, impatiëns, kantblom (Ammi majus), petunia, tabakblom (Nicotiana alata), Nicotiana sylvestris, Pandorea jasminoides ‘Lady Di’, trots-van-Indië, shastamadeliefies en viburnum heelwat langer as blomme in ander kleure sigbaar bly.
Die fyn wit spreidende blomme van die Mystacidium capense, witkatjiepiering (Gardenia thunbergii ), rypsensitiewe Stephanotis floribunda en sterjasmyn (Trachelospermum jasminoides) verleen ook geur aan ’n skemertuin. • Knyp gereeld dooie blomknoppe af om meer blomvorming aan te moedig. Kyk terselfdertyd watter blomme beter vaar op warm dae. • Kies inheemse, hittebestande plante vir die winterreënstreek se warm, droë somers; hulle sal die strawwe toestande die beste hanteer. Gooi ’n dik deklaag van growwe kompos of basstukkies om vog in die grond te help behou en te verhoed dat die wind jou tuin se bogrond wegwaai. • Terwyl dit in die somerreënstreek warm en droog is, maak een keer per week goed nat, pleks van net bolangs elke dag. Groot grasperke is arbeidsintensief en vra baie water; vervang dit liewer met grondbedekkers, plaveistene of gruis. • Keer dat jou blaarslaai uitloop deur tydelike skadunet oor die bedding te plaas. Plant ’n paar saailinge op ’n slag, hou die grond klam en oes terwyl die blare jonk en sappig is. Variëteite soos ‘Great Lakes’ en ‘Butterhead’ vaar goed in die somerhitte. • Kyk uit vir geel-en-swart ruspes wat in die blare en blomme van nerinas, clivias en Amaryllis boor. Spuit met Margaret Roberts-ruspedoder. • Snoei poinsettias en krisante terug om bosagtige groei en meer blomvorming aan te moedig. Krismisrose blom nou in oorvloed en moet goed natgemaak word en ’n goeie deklaag kry; spuit ook die loof op warm dae met ’n newelspuit. • Maak vrugtebome een keer per week deeglik nat. Spuit teen vrugtevlieë en tel vrugte wat geval het, op; dit kan vol vrugtevlieg-larwes wees. Takke moet stewig vasgesteek wees om teen windskade beskerm te word. >>