’n Salige binne-buite-leefstyl in ’n kompakte ruimte op Suurbraak
Dié kompakte toevlug op Suurbraak is weggesteek tussen die bome waar die eienaars deel voel van die natuur.
Bridget Impey en Maggie Davey het jare lank een besige stad (Johannesburg) vir ’n ander (Kaapstad) verruil wanneer hulle met vakansie gegaan het. Maar waarna hulle eintlik gesmag het, was ’n ware wegbreek; toe besluit hulle om die vakansiehuis van hul drome te bou – ’n afgesonderde huisie onafhanklik van die kragnetwerk buite Suurbraak.
“Hier kweek gesinne nog hul eie groente, jong mans ry hul perde bloots deur die dorp en almal swem saam in die Buffeljagsrivier,” sê Bridget.
Die paartjie het die 1 800 m²-erf in 2004 gekoop. Dis omring deur ’n boekenhoutwoud en sowat 3 km buite die middedorp.
“Die omgewing was vir ons wild en idillies, en die eiendom was bekostigbaar,” onthou Bridget. “Maar vir jare nadat ons die erf gekoop het, het ons net af en toe kom kuier en meestal net die terrein skoongemaak.”
Maar dit alles het verander ná ’n vakansie in 2013 in Kambodja. “Ek en Maggie het deur die oerwoud gereis en gesien hoe wonderlik dit is om eenvoudig te leef. Die huise met die hangmatte op die dek, wat tipies is van die streek, was vir ons pragtig,” verduidelik Bridget.
Met hul terugkoms in Suid-Afrika het hulle begin beplan presies waar die dek op hul eiendom sou staan; dis daardie selfde jaar nog gebou. “Vir Kersfees 2014 het ek, Maggie, my dogter, skoonseun en twee kleinkinders almal op die dek gekamp – en dit was die heerlikste vakansie!”
Gedurende 2015 het Bridget en Maggie met die kenners by 26’10 South Architects saamgewerk aan ’n plan vir hul houthuisie; baie daarvan is op die einste dek uitgedink.
Hul huis is dieselfde jaar voltooi en daardie Kersfees kon hulle hul nuwe blyplek die eerste keer benut. Pure genot!
Hart en siel
Bridget en Maggie wou ’n beskeie blyplekkie hê sonder dat dit beknop voel. “Ons wou omring wees met prettige, gemaklike items wat lank hou,” sê Bridget.
Albei is uitgewers by Jacana Media, en hul betrokkenheid by boeke het ’n rol gespeel in die beplanning van die huis. “Dit het beslis ’n invloed op die manier hoe ons na die wêreld kyk,” verduidelik Bridget.
Trouens, hulle het die boek Contemporary South African Architecture in a Landscape of Transition, saamgestel deur Henning Rasmuss, Thorsten Deckler en sy vrou, Anne Graupner, saam uitgegee.
“Hulle was dus die eerste mense by wie ons gaan kers opsteek het toe ons begin dink aan bou,” sê Bridget. “Dit was so ’n aangename proses om saam met hulle te sit en beplan aan ’n huis wat in al ons behoeftes voorsien: ’n enkele slaapkamer bo met ’n uitsig wat ons laat voel of ons hoër as die boomtoppe is, ’n werkspasie, naatlose vloei tussen binne en buite, lekker kookplek en oorgenoeg slim bêreplek wat nie te veel ruimte in beslag neem nie.”
Daar is beslis geen gebrek aan slim planne vir bêreplek in dié huis nie; elke sentimeter word doeltreffend benut sodat die ruimte nie beknop voel nie. Alles het sy plek en kan weggepak word in verskeie hoekies en gaatjies, insluitend onder die dek. “Ons het selfs van die vensterbanke laat uithaal sodat ons nie in die versoeking kom om goed daar staan te maak nie!” sê Bridget laggend.
“Ons is net dol oor die eenvoud en ruim gevoel,” voeg sy by. “Dis ons rustige toevlug waar skape, bokke, beeste en ystervarke vry rondloop; waar ons ’n pragtige uitsig op die Langeberg het; waar ons water uit die berge kom en die elektrisiteit van die son.
Ons is mal oor die gevoel van buite en binne wat soos een voel. – Bridget