Eers heelmaak, dan mooimaak
Hoewel Martie vuur en vlam was vir mooimaak, was die bus se raamwerk erg verwaarloos en voos, en die vloer so te sê deurgeroes. Dit moes eerste aandag kry.
“Voordat ons enigiets kon doen, moes Gert seker maak die bus is waterdig, roesvry en struktureel gesond. Dít was op sigself ’n avontuur. Ons het almal ingespring en gehelp, selfs Gerrit, wat toe maar agt jaar oud was.
“Die opknapwerk sou drie maande neem,” onthou Martie. “Geen drama of probleem volgens my baie bekwame en talentvolle man nie.” Maar uiteindelik het dit 18 maande van omvattende meganiese herstelwerk, roesverwydering en spuitverfwerk, en die inrig van die binneruimte, geword.
Intussen het die bus ’n bynaam gekry – Wange, ’n verwysing na die voorwiele se kenmerkende Bedfordrondings – en Gert sy kode 10-rybewys.
Gert het al die meganiese herstelwerk gedoen, en Wange se ADE Mercedes 352-enjin is nou so goed as nuut.
“Die enjinblok, krukas en oliebak is al wat van die oorspronklike enjin oorgebly het,” vertel Gert, wat ook die spuitverfwerk saam met twee vriende gedoen het. Al waarmee hy professionele hulp gehad het, was die opknap van die enjin se subsamestel en die voorbereiding vir die spuitverfwerk.
Met al die noodsaaklike herstelwerk agter die rug, kon Gert en Martie die bus vir hul behoeftes begin inrig.
“Kwotasies vir ingeboude kaste en meubels was eenvoudig buite ons begroting en Gert het hiermee ook self ingespring,” vertel Martie. “Ek het my wit eenvormige Sweedse leefruimte gekry, al was die projek op die ou einde ’n saak van gebed,” sê Martie. “Die gebede het meer oor my eie geduld as oor enigiets anders gegaan ...”
Hul eerste wegbreek met die bus was in September 2015, Struisbaai toe. Gert het nie gejok toe hy gesê het die bus is ’n bargain nie. Wange is nou vir R350 000 verseker – meer as dubbel die aankoop- en herstelkoste.
“Vir my is die lekkerste dat ons kan gaan staan waar dit vir ons mooi is, en dat ek my eie huis het waar ek ook al is, met my eie emalje en mooigoed,” sê Martie. “Met elke trip skep ek my eie wêreld.
“Dit sou nie dieselfde gewees het as ons iemand betaal het om die opknapwerk te doen nie.”