Take vir Januarie
Werk slim met water
As daar min reën val of waterbeperkings in jou omgewing ingestel is, is daar wel maniere om dié kosbare hulpbron in jou tuin te bewaar. Probeer dié wenke: • Kies die regte plante Om volwasse bome en struike te vervang, sal net te veel tyd en geld kos – laat hulle dus tydens waterbeperkings voorkeur geniet. Die meeste plante uit die winterreënstreek (soos fynbos), en uit Mediterreense lande (soos laventel) hanteer droë somers goed, terwyl plante uit die somerreënstreek meer gereeld water sal moet kry. • Groepeer plante met soortgelyke waterbehoeftes saam, pleks van volgens kleur of tekstuur. Plant dié wat die meeste water nodig het naby die huis en in groot potte op die patio. Groepeer eerder plante met hoë waterbehoeftes saam in groot potte pleks van in ’n klomp klein potte en hangmandjies. • Strooi ’n deklaag ’n Laag organiese materiaal soos basstukkies, kompos of dennenaalde, 8–10 cm dik, sal vog in die grond behou. Los ook blare wat op die grond val as ’n natuurlike deklaag rondom struike. Deklae versmoor onkruid en keer dat die wind jou grond uitdroog. Maak die grond goed nat voor jy die deklaag strooi en laat ’n klein opening om die stamme. • Natmaak Vang in die somerreënstreek reënwater in tenke op. Maak seker die water bereik die wortels; as jy net bolangs natmaak, droog jou plante se oppervlakwortels uit. • Belê in ’n gryswaterstelsel sodat jy water in jou tuin kan hergebruik. Gryswater kom van die bad, stort en wasmasjien (indien jy bio-afbreekbare seep gebruik). Water uit die kombuiswasbak is nie geskik nie omdat dit vette bevat.