Vetplante floreer ondanks die droogte

In hangmandjies, blikkies, potte en kissies – met vetplante maak jy sommer maklik mooi.

Gee jou verbeelding vrye teuels as dit by vetplante kom, want met dié waterwys staatmakers is daar geen einde aan die moontlikhede om die perfekte prentjie te skep nie, sê Ann Kerr van The Pink Geranium-kwekery, waar ons die foto’s geneem het, en Buck Hemenway van die Calitzdorpvetplantvereniging.

#1 Hang hulle op

Volgens Ann is vetplante met hul vlesige blare perfek vir ’n hangmandjie. “Hulle kan vir lang tye sonder water oorleef en maak ’n pragtige vertoning. Baie vetplante se groeiwyse is geskik hiervoor, selfs ’n jong aalwyn. Volg jou instink en plant wat vir jou mooi is.” So maak jy jou eie hangmandjies:

Wat jy nodig het

• draadmandjie • klapperhaar (opsioneel) • goeie, krummelrige potplantgrond wat goed dreineer • organiese kunsmis • ’n verskeidenheid vetplante

SO MAAK JY

Begin deur die hangmandjie met klapperhaar uit te voer as dit nie reeds so ’n voering het nie. Vul dit halfpad met die potplantgrond en meng ’n hand vol kunsmis daarby. Besluit hoe jy die vetplante wil rangskik. Dink daaraan dat jy besig is om ’n mini-tuin in die mandjie te skep. Begin met die middelpunt en plant rondom dit. Vul die mandjie op met potplantgrond en maak goed nat. Voed die plante elke sowat twee maande met ’n organiese kunsmis soos Talborne. Jou mandjie sal heeljaar mooi lyk!